BAKI, AzerVoice
ABŞ prezidenti Donald Tramp, İranın sülhpərvər siyasət yeritdiyi təqdirdə, bu ölkəyə qarşı tətbiq edilən sanksiyaların ləğv olunacağını bəyan edib.
AzerVoice xəbər verir ki, bu barədə Tramp "Fox News" kanalına verdiyi müsahibədə danışıb.
“Əgər onlar sülhpərvər ola bilsələr və bizə artıq zərər vermək niyyətində olmadıqlarını nümayiş etdirsələr, mən sanksiyaları ləğv edəcəyəm” - deyə, Tramp bildirib. Onun fikrincə, İrana qarşı sanksiyaların ləğvi böyük əhəmiyyət kəsb edəcək.
Bundan əvvəl ABŞ KİV-ləri tərəfindən bildirilmişdi ki, Trampın xüsusi nümayəndəsi Stiven Uitkoff yaxın günlərdə İran rəsmiləri ilə Tehranın nüvə proqramına dair mümkün razılaşma mövzusunda danışıqlar aparacaq. Məlumata görə, danışıqlarda əsas müzakirə mövzusu, İranın uran zənginləşdirməyə son qoyması müqabilində sanksiyaların yumşaldılması olacaq.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
