BAKI, AzerVoice
Netanyahu Trampı Nobel Sülh Mükafatına namizəd göstərib.
AzerVoice xəbər verir ki, İsrailin baş naziri Benyamin Netanyahu ABŞ prezidenti Donald Trampı Nobel Sülh Mükafatına namizəd göstərdiyini və bu barədə məktubu Trampa şəxsən təqdim etdiyini bildirib.
Ağ Evdə keçirilən bir görüş zamanı jurnalistlərin suallarını cavablandıran Tramp və Netanyahu Fələstin, İran və Suriya ilə bağlı mövqelərini açıqlayıblar. Netanyahu bildirib ki, Qəzzadakı fələstinlilərin istəklərinə uyğun olaraq bölgədə qalmaq və ya oranı tərk etmək azadlıqları olmalıdır. “Bu yer həbsxana olmamalıdır. İnsanlara seçim hüququ verilməlidir”- deyə o bildirib.
O, fələstinlilərin müəyyən sahələrdə özünüidarə hüququna malik olmalı olduğunu qeyd edib, lakin təhlükəsizlik məsələlərinin İsrailin nəzarətində qalmasının vacibliyini vurğulayıb.
“Prezident Trampın rəhbərliyi ilə Yaxın Şərqdə bütün qonşularımızı əhatə edən geniş bir sülh qurmaq mümkündür”- deyə Netanyahu Trampın liderliyi ilə geniş regional sülhün mümkün olduğunu da bildirib.
Tramp isə çıxışında İranla danışıqlara toxunaraq bildirib ki, Tehranla təmaslar planlaşdırılıb və İran indi əvvəlkindən fərqli mövqedədir. “Onlar görüşmək və irəliləmək istəyirlər. Mən də İranın sülh yolu ilə yenidən qurulmasını istəyirəm. Artıq ‘ABŞ-a ölüm’ kimi çağırışlar eşidilmir”- deyə qeyd edib.
Tramp həmçinin Suriyaya qarşı tətbiq olunan sanksiyaların qaldırıldığını, bununla da ölkə rəhbərliyinə şans verildiyini bildirib. O, Suriya prezidenti Əhməd Şaradan “çox təsirləndiyini” də qeyd edib.
“Onlar özlərini müdafiə edə bilməlidirlər. Çox ağır hücuma məruz qalırlar”- deyə Ukraynaya silah yardımı məsələsinə də toxunan Tramp bildirib ki, Ukrayna daha çox silah alacaq.
Digər tərəfdən, Tramp və Netanyahu ABŞ-da keçiriləcək bələdiyyə seçkilərində müsəlman namizəd Zöhran Mamdaninin qalib gəlmə ehtimalı ilə bağlı açıqlamalar veriblər. Netanyahu, ICC-nin qərarına əsasən Nyu Yorka gəldiyi təqdirdə həbs oluna biləcəyi ilə bağlı sualı cavablandıraraq, “Trampla birlikdə Nyu Yorka gedəcəyik” deyib.
Mamdani isə daha əvvəlki çıxışlarında Netanyahunun həbsini dəstəklədiyini bildirmişdi. Demokratlar Partiyasının Nyu York merliyinə namizədi olan Mamdani ilkin mərhələdə seçkini qazanıb və noyabrda keçiriləcək yekun səsvermədə qalib gəlsə, şəhərin ilk müsəlman meri olacaq.
