BAKI, Azervoice , Nərmin Ağayeva
Afina Aralıq dənizi proseslərindən kənarda qalır, Türkiyə isə gücündən səmərəli istifadə edir.
Azervoice xəbər verir ki, Yunanıstanın keçmiş xarici işlər naziri Dimitris Avramopulos İstanbulda keçirilən Türkiyə–İtaliya–Liviya Əməkdaşlıq Sammitini şərh edərək, Afina hökumətinin Aralıq dənizi ilə bağlı diplomatik proseslərdən kənarda qalmasını tənqid edib.
Avramopulos bildirib ki, Ankara regional dinamikanı düzgün qiymətləndirərək geosiyasi və hərbi gücündən səmərəli istifadə edir, lakin Yunanıstan səmərəsiz xarici siyasət səbəbilə təsirsiz mövqedə qalır. O, Yunan hökumətini “qorxuya əsaslanan siyasət” yürütməkdə ittiham edib və Aralıq dənizində real və fəal strategiya qurmağın vacibliyini vurğulayıb.
Xatıladaq ki, İyulun 2-də keçirilən sammitdə Prezident Rəcəb Tayyib Ərdoğan, İtaliyanın baş naziri Giorgia Meloni və Liviya Milli Birlik Hökumətinin baş naziri Əbdülhəmid Dibeybe əməkdaşlıq, qeyri-qanuni miqrasiya və regional sabitlik məsələlərini müzakirə ediblər.
Qeyd edək ki, Yunanıstanın Liviya məsələsində əvvəlki diplomatik mövqeyi, xüsusən də Şərqi Liviyadakı Xəlifə Haftar ilə əlaqələri Afina hökumətinin beynəlxalq proseslərdə kənarda qalmasına səbəb kimi göstərilir.
