BAKI, AzerVoice, Nailə Babazadə
Rusiya prezidenti Vladimir Putinlə görüşü planlaşdırılan ABŞ nümayəndə heyətinin Moskvaya gəldiyi bildirilir.
AzerVoice xəbər verir ki, Ukraynada 2022-ci ilin fevral ayından bəri davam edən müharibəyə son qoymaq üçün Rusiya ilə diplomatik təmasları davam etdirən ABŞ Moskvaya nümayəndə heyəti göndərib.
Nümayəndə heyətinə ABŞ-ın Yaxın Şərq üzrə xüsusi nümayəndəsi Stiven Uitkoff rəhbərlik edir.
Uitkoff və onu müşayiət edən şəxslər bu gün Kremldə Putinlə görüşəcək. Məlumata görə, görüşdə Ukraynada atəşkəs üçün hər iki tərəfin tələb etdiyi ilkin şərtlər müzakirə olunacaq.
Qeyd edək ki, dünən Ağ Evdə keçirilən imzalanma mərasiminin ardından gündəmlə bağlı mətbuata açıqlama verən ABŞ prezidenti Donald Tramp Moskvada Rusiya rəsmiləri ilə görüşlər keçirəcəyini və bu danışıqların nəticəsi əsasında Rusiyaya qarşı sanksiyalara qərar verəcəyini bildirib.
Tramp Yaxın Şərq üzrə xüsusi nümayəndə Stiven Uitkoffun çərşənbə günü Moskvada Rusiya tərəfi ilə görüşəcəyini qeyd edib və bu danışıqların nəticəsini gözlədiyini bildirib.
Rusiyaya 100 faiz sanksiya tətbiq edəcəyi ilə bağlı iddialara cavab verən Tramp, "Mən heç vaxt faiz verməmişəm, amma bu barədə çox şey edəcəyik. Bildiyiniz kimi, sabah (çərşənbə axşamı) Rusiya ilə görüşümüz var. Nə olacağını görəcəyik. Sonra qərarımızı verəcəyik" deyib.
ABŞ prezidenti Rusiya-Ukrayna müharibəsini mümkün qədər tez bitirmək istədiyini, lakin prosesin göründüyündən daha mürəkkəb olduğunu vurğulayıb. O, Hindistan-Pakistan münaqişələrində Rusiyanın rolunu misal çəkərək, bu müharibəni də tez bitirmək istədiyini bildirib. Tramp atəşkəs və sülh prosesi ilə bağlı addım atmamaqda günahlandırdığı Rusiyaya qarşı tezliklə ciddi sanksiyalar tətbiq edəcəyini açıqlayıb.
