BAKI, Azervoice , Nərmin Ağayeva
Tramp Rusiya prezidenti Vladimir Putinlə yaxın zamanda görüşə biləcəyini açıqlayıb.
Azervoice xəbər verir ki, ABŞ prezidenti Donald Tramp Moskvada keçirilən ABŞ-Rusiya danışıqlarının ardınca Vladimir Putinlə mümkün görüş ehtimalının yüksək olduğunu bildirib.
O, Ağ Evdə Apple şirkətinin yeni sərmayələrinin təqdimatı zamanı çıxış edərək, Rusiya-Ukrayna müharibəsinin tezliklə başa çatmasını istədiyini və bu istiqamətdə diplomatik səylərin davam edəcəyini vurğulayıb.
Tramp jurnalistlərin “Putinlə görüş olacaqmı?” sualına, “Bəli, bunun baş vermə ehtimalı çox yüksəkdir. Hələ yer müəyyənləşməyib, amma çox yaxın zamanda ola bilər.” - deyə bildirib. O, eyni zamanda Putinin əvvəlki bəzi mövqelərinin onu məyus etdiyini də qeyd edib.
Ağ Evin mətbuat katibi Karolin Leavitt isə açıqlamasında bildirib ki, Rusiya tərəfi Trampla görüşməkdə maraqlıdır və Tramp həm Putin, həm də Ukrayna prezidenti Vladimir Zelenski ilə görüşə açıqdır.
Tramp İsrailin Qəzzanı tamamilə işğal etmə planı ilə bağlı sualdan yayınaraq mövzunu İranın nüvə proqramına yönəldib. “İranın nüvə silahı əldə etməsinin qarşısını almaqla Yaxın Şərqdə bir çox müharibəni dayandırmışıq.” - deyə o bildirib.
ABŞ prezidenti çıxışında eyni zamanda çip və yarımkeçirici məhsulların idxalına 100 faiz tarif tətbiq ediləcəyini də elan edib. Bu tarif yalnız ABŞ daxilində istehsal etməyən şirkətlərə şamil olunacaq.
Qeyd edək ki, Tramp 2024-cü ildə keçirilmiş seçkilərdə ikinci dəfə prezident seçilib və xarici siyasətdə əvvəlki administrasiyalarla müqayisədə fərqli və daha aqressiv ritorika ilə çıxış edir. ABŞ-Rusiya münasibətləri isə son illər ərzində Ukrayna müharibəsi və sanksiyalar fonunda gərgin olaraq qalır.
