BAKI, Azervoice, Nərmin Ağayeva
Putin-Tramp görüşü Birləşmiş Ərəb Əmirliklərində keçirilə bilər.
Azervoice xəbər verir ki, Rusiya prezidenti Vladimir Putin ABŞ prezidenti Donald Trampla planlaşdırılan görüş üçün Birləşmiş Ərəb Əmirliklərini (BƏƏ) mümkün məkan kimi açıqlayıb. O, BƏƏ-ni belə yüksək səviyyəli tədbirin təşkili baxımından “tamamilə münasib bir yer” adlandırıb.
Putin bu açıqlamanı BƏƏ prezidenti Şeyx Mohammed bin Zayed Al Nahyanla Kremldə keçirdiyi görüş zamanı verib. Prezident əlavə edib ki, bu cür tədbirlərin təşkilində Rusiyanın dostları arasında BƏƏ-nin mühüm rolu var və Rusiya-ABŞ sammitinə hər iki tərəfin maraq göstərməsi bu təşəbbüsü daha da gücləndirir.
Qeyd edək ki, günün əvvəlində Kremlin xarici siyasət müşaviri Yuri Uşakov yaxın günlərdə Putinlə Tramp arasında görüş keçiriləcəyini və hazırlıqların artıq başlandığını bildirmişdi. Görüşün dəqiq yeri və vaxtı barədə əlavə məlumatın yaxın zamanda açıqlanacağı gözlənilir.
