BAKI, AzerVoice, Nailə Babazadə
İngiltərə, İsrail Təhlükəsizlik Kabinetinin "Qəzza şəhərinin" işğalını təsdiqləmə qərarının yanlış olduğunu bildirərək, bu qərarın dərhal yenidən nəzərdən keçirilməsi çağırışı edib.
AzerVoice xəbər verir ki, İngiltərənin Baş naziri Keir Starmer, İsrail Təhlükəsizlik Kabinetinin Qəzza Zolağının şimalında yerləşən Qəzza şəhərinin işğalını nəzərdə tutan yeni planı təsdiqləməsinə dair yazılı açıqlama verib.
Baş nazir Starmer bildirib ki, "İsrail hökumətinin Qəzzadakı hücumlarını daha da şiddətləndirmə qərarı yanlışdır və bu qərarı dərhal yenidən nəzərdən keçirməsi üçün ciddi şəkildə çağırış edirik. Bu addım nə münaqişəyə son qoyacaq, nə də girovların azad olunmasına kömək edəcək. Sadəcə daha çox qan tökülməsinə səbəb olacaq."
Starmer, Qəzzadakı humanitar böhranın hər keçən gün daha da pisləşdiyini, İsrailli girovların isə dəhşətli və insanlığa yaraşmayan şəraitdə saxlanıldığını vurğulayıb.
"Bizim ehtiyacımız olan şey atəşkəsin elan olunması, humanitar yardımların artırılması, Həmasın əlində olan bütün girovların azad olunması və danışıqlar yolu ilə bir həll tapılmasıdır." - deyə Starmer qeyd edib.
Starmer həmçinin bildirib ki, Həmas Qəzzanın gələcəyində heç bir rol oynamamalıdır, təşkilat silahlarını buraxmalı və bölgəni tərk etməlidir.
"Müttəfiqlərimizlə birlikdə iki dövlətli həll çərçivəsində bölgədə sülhü təmin etmək və həm fələstinlilər, həm də israillilər üçün daha parlaq gələcək qurmaq üçün uzunmüddətli plan üzərində çalışırıq. Lakin hər iki tərəf səmimi niyyətlə danışıqlara başlamadığı müddətcə bu fürsət gözümüzün önündə yox olacaq. Mesajımız aydındır: Diplomatik həll mümkündür, lakin hər iki tərəf dağıdıcı yoldan dönməlidir." - deyə Starmer vurğulayıb.
BMT-nin İnsan Haqları üzrə Ali Komissarı Volker Türk də məsələyə dair yazılı açıqlamasında İsrailin planının təcili şəkildə dayandırılmalı olduğunu bildirib və əlavə edib ki, "Bu plan, Beynəlxalq Ədalət Məhkəməsinin (UAD) İsrailin işğalına mümkün qədər tez son qoyulması, razılaşdırılmış iki dövlətli həllin həyata keçirilməsi və fələstinlilərin öz müqəddəratını təyin etmək hüququnun tanınması ilə bağlı qərarına ziddir."
Türk əlavə edib ki, indiyə qədər əldə edilən bütün sübutlara əsasən, bu şiddət planı daha çox insanın zorla köçürülməsi, daha çox ölüm, ağlasığmaz iztirab, məntiqsiz dağıntılar və müharibə cinayətlərinə yol açacaq.
"Qəzzadakı müharibə dərhal dayandırılmalıdır. İsraillilər və fələstinlilər sülh içində yanaşı yaşamalıdır." - deyə qeyd edib.
O qeyd edib ki, İsrail hökuməti bu savaşı genişləndirmək yerinə, humanitar yardımın tam və maneəsiz şəkildə çatdırılmasına icazə verməli, vətəndaşların həyatını xilas etmək üçün bütün imkanlarını səfərbər etməlidir.
Sonda Türk bildirib ki, Qəzzadakı girovlar və İsrail tərəfindən özbaşına saxlanılan fələstinlilər dərhal və qeyd-şərtsiz azad edilməlidir.
Qeyd edək ki, İsrail Təhlükəsizlik Kabineti Qəzza zolağının şimalında yerləşən Qəzza şəhərinin işğalı üçün yeni planı təsdiqləyib. Yerli mənbələr İsrail ordusunun bütün şəhəri ələ keçirmək üçün hazırlıqlara başladığını bildirir.
