BAKI, AzerVoice, Nailə Babazadə
Polşa, F-16 döyüş təyyarələrinin hamısını Blok 72 Viper modelinə yüksəltmək üçün ABŞ ilə 3,8 milyard dollar dəyərində müqavilə imzalayıb.
AzerVoice xəbər verir ki, Rusiya-Ukrayna müharibəsinin davam etməsi səbəbilə Polşa hərbi modernləşdirmə səylərini gücləndirib.
Polşanın müdafiə naziri Vladislav Kosinyak-Kamyş, imza mərasimində verdiyi açıqlamada ABŞ ilə imzalanan 3,8 milyard dollarlıq modernizasiya sazişinin ölkənin 48 ədəd F-16C/D Block 52+ təyyarəsinin hamısını əhatə edəcəyini bildirib.
Kosinyak-Kamyş əlavə edib ki, mövcud C/D modelləri çox yaxşıdır, lakin 20 ildən sonra ölkənin təhlükəsizliyinə qarşı olan təhdidlər qarşısında kifayət etmir.
Bu il Ümumi Daxili Məhsulun (ÜDM) 4,7 faizini müdafiə sahəsinə ayıran Polşa, gələn il bu göstəricini 5 faizə çatdırmağı hədəfləyir.
Əgər Polşa bu hədəfinə nail olsa, iyun ayında keçirilmiş tarixi NATO sammitində alyans üzvlərinin razılaşdığı müdafiə xərclərinin ÜDM-in 5 faizinə çatdırılması hədəfinə çatan ilk ölkələrdən biri olacaq.
Digər tərəfdən, xəbərdə qeyd olunub ki, Polşanın tanklarının sayı 2030-cu ilə qədər Böyük Britaniya, Almaniya, Fransa və İtaliyanın birlikdə malik olduqları tank sayını keçəcək.
