BAKI, AzerVoice, Səməd Əyyubov
Böyük Britaniya müharibə başa çatdıqdan sonra Ukraynada seçkilərin keçirilməsinə dəstək göstərəcək.
AzerVoice-un məlumatına görə, bu barədə “Express” nəşri Ukrayna Mərkəzi Seçki Komissiyasının sədri Oleq Didenkoya istinadən xəbər yayıb.
Məlumata əsasən, çərşənbə axşamı Londonda Böyük Britaniya və Ukrayna seçki komissiyaları arasında qarşılıqlı anlaşma memorandumu imzalanıb. Sənəd ölkədə seçki prosesinin gücləndirilməsinə və beynəlxalq standartlara uyğun təşkilinə dəstək verəcək.
Razılaşmaya görə, Böyük Britaniya xaricdə səsvermənin təşkili, maliyyə məsələlərinin tənzimlənməsi, seçki bülletenləri və namizədlərin təhlükəsizliyinin təmin olunması kimi məsələlərdə Ukraynaya yardım göstərəcək. Didenkonun sözlərinə görə, memorandum Ukraynanın “tarixində ən çətin seçkilərə” hazırlanmasına imkan verəcək.
Xatırladaq ki, avqustun 18-də Ağ Evdə ABŞ prezidenti Donald Tramp, Ukrayna prezidenti Volodimir Zelenski və bir sıra Avropa liderlərinin iştirakı ilə görüş keçirilib.
Tramp görüş zamanı Ukraynada seçkilərin təxirə salınmasına eyham vuran zarafat etmiş və döyüş əməliyyatlarının bunun üçün bəhanəyə çevrildiyini söyləmişdi. Zelenski isə cavabında yaxın zamanda əlavə təhlükəsizlik tədbirləri ilə demokratik seçkilərin təşkil ediləcəyini bəyan etmişdi.
