İsrailin müdafiə naziri “Qəzza əməliyyatı” planını təsdiqlədi – 60 min ehtiyat əsgər çağırılacaq

İsrailin müdafiə naziri İsrael Kats Qəzza şəhərinə nəzarəti ələ keçirməyi nəzərdə tutan hərbi planı təsdiqləyib və 60 minə yaxın ehtiyat əsgərin çağırılması barədə göstəriş verib. Bu barədə çərşənbə günü Müdafiə Nazirliyi məlumat yayıb. İsrael Kats “İsrail ordusunun Qəzza şəhərinə hücum planını” təsdiqləyib və “tapşırığın icrası üçün tələb olunan ehtiyat qüvvələrin çağırışına” razılıq verib.

20 Avqust 2025 11:11

BAKI, AzerVoice

AzerVoice xəbər verir ki, İsrael Kats “İsrail ordusunun Qəzza şəhərinə hücum planını” təsdiqləyib və “tapşırığın icrası üçün tələb olunan ehtiyat qüvvələrin çağırışına” razılıq verib.

İsrail mediası yazır ki, ordunun yüksək rütbəli rəsmiləri döyüşlərin ən azı 2026-cı ilə qədər davam edə biləcəyini ehtimal edir. Onların sözlərinə görə, ümumilikdə 130 minədək ehtiyat əsgər səfərbər oluna bilər, hazırda xidmətdə olanların isə xidmət müddəti bir ay uzadılacaq. Kats “Haaretz” qəzetinə açıqlamasında bildirib:
“Əməliyyat başa çatdıqdan sonra Qəzza əvvəlki kimi görünməyəcək, hər şey dəyişəcək.”

“Times of Israel” qəzeti yazır ki, müdafiə naziri təxminən 1 milyon mülki şəxsin Qəzza şəhərindən sektorun cənubuna köçürülməsi üçün hazırlıqlara da razılıq verib. Mənbənin məlumatına görə, İsrail ordusu hazırda Qəzza zolağının 75 faizinə nəzarət edir və bu, HƏMAS-a girovlarla bağlı razılaşma üçün təzyiq göstərmək məqsədi daşıyır.

İsrail Müdafiə Nazirliyi bu gündən etibarən on minlərlə ehtiyat əsgərin təcili çağırış vərəqələrinin göndəriləcəyini açıqlayıb. Məqsəd genişmiqyaslı quru əməliyyatının son hazırlıqlarını yekunlaşdırmaqdır.

Əvvəlki təxminlərdə ehtiyat qüvvələrin sayının 80 minlə məhdudlaşdırılacağı bildirilsə də, son plan bu rəqəmin 130 minə qədər yüksələ biləcəyini göstərir. Bu səfərbərlik, İsrailin eyni zamanda “Hamas”ın qəbul etdiyi əsir mübadiləsi təklifini nəzərdən keçirdiyi bir vaxtda həyata keçirilir.

Müdafiə Nazirliyi bildirir ki, plan İsrail ordusunun Baş Qərargah rəisi Eyəl Zamir tərəfindən artıq təsdiqlənib və yaxın günlərdə Təhlükəsizlik Kabinetinin müzakirəsinə çıxarılacaq. Məlumata görə, əməliyyata “Qəzza diviziyası” ilə yanaşı daha 5 diviziya cəlb olunacaq.

“Yedioth Ahronoth” qəzetinə bağlı “Ynet” portalı isə yazır ki, Baş Qərargah rəisi ehtiyat qüvvələrin sentyabr ayında əməliyyata cəlb olunmasını istəyib.