Tramp FED tarixində ilk dəfə idarə heyəti üzvünü işdən azad edib

Tramp Kuka yazdığı məktubu sosial şəbəkədə paylaşaraq, FED qanununa istinadən onun dərhal vəzifədən kənarlaşdırıldığını bildirib. Bu addım, FED-in 111 illik tarixində bir prezident tərəfindən idarə heyəti üzvünün vəzifədən azad edilməsi ilə bağlı ilk hadisə kimi qeydə alınıb. Tramp, Kukun iki həftə arayla Miçiqan və Corciyada iki fərqli mülkü əsas iqamətgah kimi göstərərək ipoteka sənədlərində yalan ifadələr işlətdiyini iddia edib. O, bu davranışın FED-in etibarlılığına xələl gətirdiyini və Kukun vəzifədə qalmasının qəbuledilməz olduğunu vurğulayıb.

26 Avqust 2025 09:20

BAKI, AzerVoice, Nərmin Ağayeva

ABŞ prezidenti Donald Tramp Federal Ehtiyat Sisteminin (FED) İdarə Heyətinin üzvü Liza Kuku ipoteka müqavilələrində yalan ifadələr verdiyi iddiası ilə vəzifəsindən azad edib.

AzerVoice xəbər verir ki, Tramp Kuka yazdığı məktubu sosial şəbəkədə paylaşaraq, FED qanununa istinadən onun dərhal vəzifədən kənarlaşdırıldığını bildirib. Bu addım, FED-in 111 illik tarixində bir prezident tərəfindən idarə heyəti üzvünün vəzifədən azad edilməsi ilə bağlı ilk hadisə kimi qeydə alınıb. Tramp, Kukun iki həftə arayla Miçiqan və Corciyada iki fərqli mülkü əsas iqamətgah kimi göstərərək ipoteka sənədlərində yalan ifadələr işlətdiyini iddia edib. O, bu davranışın FED-in etibarlılığına xələl gətirdiyini və Kukun vəzifədə qalmasının qəbuledilməz olduğunu vurğulayıb.

Kuk isə keçən həftə Federal Mənzil Maliyyə Agentliyinin (FHFA) direktoru Bill Pultenin onun haqqında araşdırma tələb etdiyi iddialarına cavab olaraq, “Twitdə qaldırılan suallara görə vəzifəmdən istefa vermək fikrində deyiləm,” - deyərək istefaya çağırışları rədd edib. Lakin Trampın qərarı ilə Kuk vəzifəsindən uzaqlaşdırılıb.

Qeyd edək ki, Trampın bu addımı FED-in müstəqilliyinə müdaxilə kimi qiymətləndirilib və ABŞ-ın bəzi siyasi dairələrində, xüsusən də senator Elizabet Uorren kimi demokratlar tərəfindən “qanunsuz hakimiyyət cəhdi” kimi tənqid olunub. Məsələnin məhkəməyə daşınması və Trampın qərarının qanuniliyinin müzakirə olunacağı gözlənilir.