BAKI, AzerVoice, Fərid Mikayılov
İranın xarici işlər naziri Abbas Əraqçi Hörmüz boğazının bağlanmasının Tehranın rəsmi siyasətinə uyğun olmadığını açıqlayıb.
AzerVoice xəbər verir ki, o bildirib ki, ölkəsinin mövqeyi “tamamilə aydındır” və əsas hədəf Fars körfəzində sülh, sabitlik və təhlükəsizliyin qorunmasıdır.
Əraqçi vurğulayıb ki, İran iqtisadiyyatının böyük hissəsi neft istehsalı və ixracına əsaslandığı üçün beynəlxalq sularda sərbəst naviqasiya bütün ölkələr üçün həyati əhəmiyyət daşıyır.
“İran istehsalçı və ixracatçı dövlətdir. Ona görə də hamı üçün azad dəniz hərəkətini istəyirik”- deyə o bildirib.
Nazir bölgədə baş verən son hadisələrə toxunaraq, Qəzzada baş verənlər, Livan və Suriyada gərginlik, habelə ABŞ-İsrail hücumlarının region xalqlarına gerçək düşmənin kim olduğunu göstərdiyini deyib.
“Hamı anlayır ki, regionu zəif və parçalanmış saxlamaq istəyən əsas qüvvə İsraildir”- deyə Əraqçi qeyd edib.
Əraqçi nüvə proqramı ilə bağlı danışıqların perspektivinə də münasibət bildirib. Onun sözlərinə görə, İran Fransa, Böyük Britaniya və Almaniya ilə, həmçinin Beynəlxalq Atom Enerjisi Agentliyi (MAQATE) ilə yeni əməkdaşlıq çərçivəsi üzərində işləyir.
Nazir ABŞ-la birbaşa danışıqları istisna etsə də, dolayı təmaslara açıq olduqlarını qeyd edib.
“ABŞ hərbi hücum etməyəcəyinə zəmanət verərsə, dolayı danışıqlara hazırıq. Ədalətli, qarşılıqlı maraqlara əsaslanan müzakirələr hər iki tərəf üçün faydalı olar. Ancaq hərbi yolla əldə edə bilmədiklərini danışıqlar masasında qazanacaqlarını düşünürlərsə, bu baş tutmayacaq”- deyə nazir bildirib.
