BAKI, AzerVoice, Nərmin Ağayeva
ABŞ Konqresinin bəzi üzvləri İsrailin Suriyaya hücumlarını dayandırmasını tələb edərək, Dəməşqdə sabitliyin qorunmasının vacibliyini vurğulayıb.
AzerVoice xəbər verir ki, ABŞ senatorları Jeanne Shaheen, Joni Ernst və Nümayəndələr Palatasının üzvü Joe Wilson İsrailin Suriyadakı son hərbi əməliyyatlarını pisləyən birgə bəyanat dərc edib. Bəyanatda qeyd olunub ki, Suriya 14 ildən çox davam edən münaqişələrdən sonra sabitliyə və irəliləyişə ehtiyac duyur, lakin İsrailin hücumları bu məqsədə çatmağı çətinləşdirir. Konqresmenlər, xüsusilə avqustun 27-də Dəməşq çölündəki Qusvah bölgəsində 6 Suriya əsgərinin həlak olması ilə nəticələnən pilotsuz təyyarə zərbələrini və Mani dağına endirilən hava hücumlarını tənqid ediblər.
Senatorlar və Wilson, Suriyaya son səfərlərini xatırladaraq, ABŞ-ın bu ölkəyə tətbiq etdiyi sanksiyaların ləğvini dəstəklədiklərini və Dəməşq hökumətinin sabitliyə ehtiyacı olduğunu bildiriblər. “İsrail bu fürsətdən istifadə etməli və hərbi əməliyyatları dərhal dayandırmalıdır ki, Suriyalılar və ABŞ-ın xüsusi nümayəndəsi Tom Barrackın əldə etdiyi irəliləyiş davam etsin. Sabit və təhlükəsiz Suriya İranın təsirindən xilas olmaq və İŞİD təhlükəsini cilovlamaq üçün yeganə yoldur.” -deyə onlar bəyan ediblər.
Qeyd edək ki, İsrail 8 dekabr 2024-cü ildə Qolan Təpələrindəki bufer zonasını işğal edərək Suriya ərazisindəki hərbi mövqelərini genişləndirib və paytaxt Dəməşqə yaxın ərazilərə hücumlar təşkil edib. Baş nazir Benyamin Netanyahu Suriyanın cənubunda daimi işğal siyasəti yürüdəcəyini və bu ərazinin silahsızlaşdırılmasını tələb etdiyini açıqlayıb, bu isə 1974-cü il Qüvvələrin Ayrılması Müqaviləsinin pozulması kimi qiymətləndirilir.
