BAKI, AzerVoice, Səməd Əyyubov
İsrailin baş naziri Benyamin Netanyahu Belçikanın baş naziri Bart de Viveri “zəif lider” adlandırıb.
AzerVoice-un məlumatına görə, Netanyahu bu ifadəni Belçikanın digər Avropa ölkələrinin nümunəsini izləyərək Fələstin dövlətini tanımaq niyyətinə görə işlədib.
Netanyahunun ofisinin yaydığı bəyanatda deyilir: “Belçika baş naziri de Viver zəif liderdir. O, İsrailin hesabına radikal islamçı terroru sakitləşdirməyə çalışır. Terror timsahını bəsləyərək onun Belçikanı udmasını gecikdirəcəyinə ümid edir. İsrail buna razı olmayacaq və özünü müdafiə etməyə davam edəcək.”
Qeyd edək ki, Belçikanın xarici işlər naziri Maksim Privo açıqlamasında ölkəsinin bu ilin sentyabrında Nyu-Yorkda keçiriləcək BMT Baş Assambleyası iclaslarında Fələstin dövlətini tanıyacağını bildirib. Bununla da Belçika Fransanın və Kanadanın da daxil olduğu digər dövlətlərə qoşulacaq.
“Belçika BMT Baş Assambleyası çərçivəsində Fələstin dövlətini tanıyacaq! İsrail hökumətinə qarşı isə sərt sanksiyalar tətbiq olunacaq” - deyə, Privo "X" sosial şəbəkə hesabında yazıb
Nazir əlavə edib ki, Belçika Nyu-York Bəyannaməsinə imza atan ölkələrə qoşulmaqla iki dövlətli həll yolunun tanınmasına dəstək verəcək.
Xatırladaq ki, iyulun sonunda Fransa prezidenti Emmanuel Makron ölkəsinin sentyabrın 9-dan 23-dək keçiriləcək Baş Assambleya iclaslarında Fələstin dövlətini tanıyacağını açıqlamışdı. Bundan sonra 10-dan çox Qərb ölkəsi Fransanın bu addımını izləyəcəyini bəyan edib.
