BAKI, AzerVoice, Səməd Əyyubov
ABŞ-ın paytaxtı Vaşinqtonda minlərlə insan küçələrdə aksiya keçirərək prezident Donald Trampdan Milli Qvardiya qüvvələrinin şəhərdən çıxarılmasını tələb edib.
AzerVoice-un məlumatına görə, “Hamımız paytaxtıq” adı altında təşkil olunan yürüşdə qeydiyyatsız miqrantlar və fələstinlilərə dəstək verən iştirakçılar da yer alıblar.
Etirazçılar Trampa qarşı şüarlar səsləndirib, “Tramp indi getməlidir”, “Paytaxtı azad edin” və “Diktaturaya qarşı çıxın” sözlərinin yazıldığı plakatlar qaldırıblar.
Xatırladaq ki, Tramp ötən ay şəhərdə cinayətlərin artdığını əsas gətirərək qanun və asayişi bərpa etmək məqsədilə hərbçiləri küçələrə çıxardığını bəyan etmişdi. O, həmçinin Vaşinqton polis idarəsini birbaşa federal nəzarət altına almış və küçələrdə təhlükəsizliyi təmin etmək üçün Miqrasiya və Gömrük Xidməti də daxil olmaqla federal hüquq-mühafizə qurumlarının əməkdaşlarını şəhərə göndərmişdi.
Bununla belə, ABŞ Ədliyyə Nazirliyinin məlumatına görə, son bir ildə Vaşinqtonda zorakı cinayətlərin səviyyəsi son 30 ilin ən aşağı həddinə düşüb.
Hazırda şəhərdə altı respublikaçı qubernatorun idarə etdiyi ştatlardan gətirilmiş hərbçilər də daxil olmaqla iki mindən çox Milli Qvardiya əsgəri patrul xidmətindədir. Onların missiyasının nə vaxt başa çatacağı hələ məlum deyil. Lakin ordunun açıqlamasına əsasən, Milli Qvardiyanın Vaşinqtonda qalma müddəti noyabrın 30-na qədər uzadılıb.
