BAKI, AzerVoice, Nailə Babazadə
UNICEF-in yeni hesabatına görə, dünyada ilk dəfə olaraq kök uşaqların sayı arıq uşaqların sayını ötüb. 5–19 yaş arası təxminən 188 milyon uşaq kökdür. Mütəxəssislər, ənənəvi qidalanma vərdişlərinin yerini ucuz və emal olunmuş qidaların almasının ciddi risk yaratdığını vurğulayırlar.
AzerVoice xəbər verir ki, Birləşmiş Millətlər Təşkilatının Uşaq Fondu (UNICEF) uşaqların sağlamlığı ilə bağlı diqqətçəkən məlumatlar yayımlayıb.
Hesabata görə, 5–19 yaş arası təxminən 188 milyon uşaq və yeniyetmə kökdür. Bu isə hər 10 uşaqdan birinin kök olması deməkdir. Artıq çəkili hesab edilən uşaqların ümumi sayı isə 391 milyona çatıb. Yəni hər 5 uşaqdan biri artıq çəkilidir.
Mütəxəssislərə görə, piylənmənin artmasının əsas səbəbi ucuz və yüksək kalorili emal olunmuş qidaların yayılmasıdır. Ənənəvi qidalanma tərzi yerini fast food və paketlənmiş məhsullara verir. Bu da uşaqlarda şəkərli diabet, ürək xəstəlikləri və xərçəng riskini artırır.
UNICEF-in Baş Direktoru Ketrin Rassell bildirib: “Qidalı və əlçatan yeməklər hər bir uşaq üçün hüquqdur. Piylənmə uşaqların sağlamlığı və inkişafı üçün artan bir təhdiddir.”
Hesabata əsasən, piylənmənin 2035-ci ilə qədər qlobal iqtisadiyyata illik 4 trilyon dollar xərc gətirəcəyi gözlənilir. UNICEF hökumətləri məktəb bufetlərində emal olunmuş qidaları qadağan etməyə, sağlam olmayan yemək və içkilərə əlavə vergi tətbiq etməyə və sağlam məhsullara çıxışı asanlaşdırmağa çağırır.
