BAKI,AzerVoice, Fərid Mikayılov
İranın xarici işlər naziri Seyyid Abbas Əraqçi, Avropa üçlüyü (E3) — Fransa, Almaniya və Böyük Britaniyanın ABŞ və İsrailin son hərbi təcavüzünü görməzdən gəlməsini “məsuliyyətsiz və əsassız yanaşma” adlandırıb.
AzerVoice xəbər verir ki, Əraqçi, BMT baş katibi Antonio Quterreşlə telefon danışığında E3 ölkələrinin əvvəl ləğv olunmuş BMT Təhlükəsizlik Şurası qətnamələrini yenidən qüvvəyə mindirmək təhdidinə toxunaraq, bunun vəziyyəti daha da mürəkkəbləşdirəcəyini bildirib.
O, İranın Nüvə Silahlarının Yayılmaması Müqaviləsi (NPT) çərçivəsində xalqının hüquqlarını və maraqlarını qorumaq öhdəliyini vurğulayıb və BMT-dən, eləcə də üzv dövlətlərdən İranın dinc nüvə obyektlərinə qarşı qanunsuz hücumları qəti şəkildə pisləmələrini tələb edib.
Nazir, son hücumların ardından İranın Beynəlxalq Atom Enerjisi Agentliyi (MAQATE) ilə öhdəliklərinin yerinə yetirilməsi istiqamətində konstruktiv dialoq apardığını qeyd edib. O, Avropa dövlətlərini və Təhlükəsizlik Şurası üzvlərini bu inkişafı dəyərləndirməyə çağırıb.
Əraqçi həmçinin Qəzzadakı vəziyyəti “dünyanın ən təcili böhranı” adlandırıb və İsrailin işğal olunmuş Fələstin ərazilərində törətdiyi hərəkətləri kəskin tənqid edib. O, İsrailin Qətərə qarşı son “terror hücumunu” da pisləyərək, beynəlxalq ictimaiyyəti, BMT-ni və baş katibi soyqırımı dayandırmağa, İsrailin təcavüzkar siyasətini cilovlamağa çağırıb.
Öz növbəsində Antonio Quterreş, İran ilə MAQATE arasında əldə olunan son razılaşmanı alqışlayıb və BMT-nin İranın nüvə proqramı ətrafında dialoq və diplomatik səyləri dəstəkləməyə davam edəcəyini vurğulayıb.
