BAKI,AzerVoice, Fərid Mikayılov
Yaponiya Baş naziri İşiba Şigeru, İsrailin iki dövlətli həll prosesini əngəlləyən addımlarını davam etdirməsi halında ölkəsinin Fələstin dövlətini tanıya biləcəyini bəyan edib.
AzerVoice xəbər verir ki, İşiba, BMT-nin 80-ci Baş Assambleyasında çıxışı zamanı İsrailin Qəzzadakı hücumlarını “qətiyyən qəbuledilməz” adlandıraraq onların dərhal dayandırılmasının vacibliyini vurğulayıb.
O, həmçinin HƏMAS-a əlində saxladığı əsirləri azad etməsi çağırışını edib.
Yaponiya Baş naziri həmçinin BMT Təhlükəsizlik Şurasının (BMT TŞ) mövcud strukturunun qlobal problemlərin həllində aciz qaldığını qeyd edib.
“İkinci Dünya Müharibəsindən sonra yaradılan BMT-nin hazırkı quruluşu artıq işlək deyil. Sülh və təhlükəsizlik öz-özünə təmin olunmur, fəal şəkildə qorunmalıdır,” – deyə İşiba bildirib.
O, beş daimi üzvün veto hüququnun böhranlı vəziyyətlərdə qərar qəbulunu iflic etdiyini vurğulayıb.
İşiba, TŞ-də təcili islahatların aparılmalı olduğunu, həm daimi, həm də qeyri-daimi üzvlərin sayının genişləndirilməsinin zəruri olduğunu söyləyib.
