BAKI, AzerVoice
ABŞ-ın Texas ştatında məhkəmə 43 yaşlı Elizabet Volf adlı qadını üç yaşlı müsəlman uşağı boğmağa cəhd etdiyi üçün 5 il müddətinə azadlıqdan məhrum edib.
AzerVoice xəbər verir ki, hadisə 2024-cü ilin may ayında Euless şəhərində yerləşən yaşayış kompleksinin hovuzunda baş verib.
Polis məlumatına görə, cinayətin əsas motivi irqçilik zəmnində olub. Məhkəmə sənədlərinə və CBS News ilə Fort Worth Star-Telegram qəzetinin yayımladığı məlumatlara əsasən, hakim Endi Porter Volfu "qəsdən adam öldürməyə cəhd" ittihamı ilə təqsirli bilib və hökm çıxarıb.
Hadisə zamanı Volf uşağın anası ilə mübahisə edib, daha sonra isə üç yaşlı qızcığazı hovuzda boğmağa çalışıb və anasının digər övladını – altı yaşlı oğlanı da hədəfə alıb. Ananın müdaxiləsi nəticəsində uşaqlar xilas olunub, təcili tibbi yardım onların sağlamlığını yoxladıqdan sonra vəziyyətlərinin normal olduğunu açıqlayıb.
Qeyd edək ki, hadisə ABŞ prezidenti Co Bayden tərəfindən də qınanmışdı. Hüquq müdafiəçiləri bildirirlər ki, 2023-cü ildə HƏMAS-ın İsrailə hücumundan və ardınca İsrailin Qəzzada hərbi əməliyyatlara başlamasından sonra ABŞ-da müsəlmanlara, ərəblərə və yəhudilərə qarşı nifrət zəminində hücumlar artıb.
