BAKI, AzerVoice, Orxan Qədirzadə
ABŞ-nin Türkiyə səfiri və Suriya üzrə xüsusi nümayəndəsi Tom Barak, Qəzzada əldə olunan atəşkəsi dəyərləndirərək bildirib ki, Türkiyənin iştirakı olmasa, tərəflər razılığa gələ bilməzdi. Onun sözlərinə görə, ABŞ Prezidenti Donald Tramp bu səbəbdən Prezident Rəcəb Tayyib Ərdoğana dörd dəfə təşəkkür edib.
AzerVoice xəbər verir ki, Barak bu barədə Bəhreynin paytaxtı Manamada keçirilən Beynəlxalq Strateji Araşdırmalar İnstitutu forumunda bölgədəki siyasi proseslər, Qəzza və Türkiyənin roluna dair çıxış edərkən deyib.
O əlavə edib ki, Türkiyə ilə yanaşı Qətər də prosesdə həlledici rol oynayıb.
Onun sözlərinə görə xüsusilə Türkiyənin HƏMAS-la münasibətləri və onları terror təşkilatı kimi tanımaması, onları danışıqlara razı salıb.
Tramp administrasiyasının bölgədəki siyasətini dəyərləndirən Barak “Prezident bütün regionda siyasi xəritəni dəyişdi. Türkiyə və İsrail müharibəyə girməyəcək. Əksinə, Xəzərdən Aralıq dənizinədək əməkdaşlıq dalğası görünəcək.”-deyib.
Barak çıxışında regionun tarixi kontekstinə də toxunub. O deyib ki, Osmanlı imperiyasının süqutundan sonra Qərbin tətbiq etdiyi bütün modellər səhv idi. Millətlərə, dinlərə və sərhədlərə qarşı müstəmləkə yanaşması heç vaxt işləmədi və bu sistemlərin hamısı iflasa uğradı.
Barak, Şam administrasiyası ilə Suriyada SDQ adı altında fəaliyyət göstərən YPG/PKK qüvvələri arasında dialoqun irəlilədiyini bildirərək (SDQ ilə) ortaq nöqtəyə yaxınlaşdıqlarını deyib.
