BAKI,AzerVoice, Orxan Qədirzadə
Fələstin Səhiyyə Nazirliyi İsrail tərəfindən daha 15 fələstinlinin nəşinin təhvil verildiyini açıqlayıb. AzerVoice xəbər verir ki, nəşlərin təhvili atəşkəs və əsir mübadiləsi prosesi çərçivəsində Beynəlxalq Qızıl Xaç Komitəsinin (ICRC) vasitəçiliyi ilə həyata keçirilib.
Qurumun Telegram kanalında yayılan məlumata görə, bu günə qədər İsrail tərəfindən ümumilikdə 330 fələstinli əsirin nəşi təhvil verilib. Onlardan 97 nəfərin şəxsiyyəti müəyyən olunub və nəşləri yaxınlarına təhvil verilib. Son təhvil edilən nəşlərdə də kimlik müəyyənləşdirmə prosesi davam etdiriləcək.
Qəzza rəsmiləri daha əvvəl bildirmişdilər ki, 10 oktyabrda qüvvəyə minmiş atəşkəs və əsir mübadiləsi çərçivəsində təhvil alınan bəzi nəşlərdə işgəncə izləri aşkarlanıb. Bu iddialar bölgədə humanitar vəziyyətin kritik olaraq qaldığını bir daha göstərir.
Nazirlik hazırda təqdim olunan bütün nəşlər üzrə tibbi və hüquqi ekspertiza prosesinin aparıldığını qeyd edib.
