BAKI, AzerVoice, Orxan Qədirzadə
ABŞ-də təhsil alan Səudiyyəli mütəxəssislər ölkəyə geri qayıdaraq aviasiya, mühəndislik və tibb sahələrində Krallığın insan kapitalını gücləndirir və Vision 2030 hədəflərinə uyğun kadr hazırlığını sürətləndirirlər.
AzerVoice xəbər verir ki, hazırda 14 mindən çox Səudiyyə tələbəsi ABŞ universitetlərində təhsil alır. Səudiyyə Ərəbistanının Vaşinqtondakı Mədəniyyət Missiyasına görə, təqaüd proqramları elit universitetlər və yüksək ixtisaslaşmış təlimlərlə məhdudlaşaraq aviasiya, mühəndislik və tibb kimi strateji sahələrə yönləndirilib.
Bu çərçivədə ABŞ-də yerləşən New Haven Universiteti və Səudiyyənin Takamol Holding şirkəti arasında yeni əməkdaşlıq elan olunub. Tərəfdaşlıq Krallığın əmək bazarı üçün liderlik və kadr hazırlığı proqramlarını inkişaf etdirməyi hədəfləyir.
ABŞ-də təhsil almış səudiyyəli aviasiya mütəxəssislərindən biri olan Məcdi əl-Əmri hazırda Mülki Aviasiya Baş İdarəsində risklərin idarə edilməsi sahəsinə rəhbərlik edir və ABŞ-də aldığı təhsil əsasında qurumda korporativ risklərin idarə olunması sisteminin formalaşdırılmasına töhfə verib.
Digər mütəxəssis Rakan əl-Ubeyd Florida Institute of Technology-də aldığı nəzəri və praktiki aviasiya hazırlığından sonra NEOM layihəsi üzrə ilkin aviasiya planlaşdırılmasında iştirak edib və hazırda Saudia Group-da Airbus A320 pilotu kimi çalışır.
Hər iki mütəxəssis bildirir ki, ABŞ təhsil proqramları yalnız peşə və uçuş hazırlığı deyil, həm də liderlik, kommunikasiya və təhlükəsizlik-əsaslı qərarvermə kimi sistem yanaşmalarını inkişaf etdirib.
Səudiyyəli mütəxəssislər ABŞ universitetləri ilə əməkdaşlığın növbəti mərhələdə sistemləşmiş karyera dəstəyi ilə güclənməli olduğunu bildirirlər.
Təklif edilən təşəbbüslər arasında "Future Leaders Track" - ABŞ-da təhsil almış Səudiyyə məzunlarını özəl sektor şirkətləri ilə əlaqələndirən proqram, birgə liderlik və kommunikasiya mərkəzi - tələbələr və məzunlar üçün peşə hazırlığı platforması nəzərdə tutulub.
Qeyd olunur ki, ABŞ-da çalışan səudiyyəli tədqiqatçılar-Dr. Hüda Asiri (Colorado Boulder), Dr. Rim Xoca (UC San Diego) və Dr. Feysəl Navab (UC Irvine) - Krallığın elmi və akademik nüfuzunu beynəlxalq miqyasda artırır.
