BAKI, AzerVoice
Venesuela ABŞ tərəfindən mümkün hücum halında iki fərqli cavab strategiyası hazırlayıb.
AzerVoice xəbər verir ki, bu barədə məlumatı Reuters yayıb.
Məlumata görə, birinci plan ölkə daxilində partizan müqavimətinin təşkilini nəzərdə tutur. Bu strategiya çərçivəsində təxribat və digər partizan əməliyyatları aparmaq üçün 280-dən çox ərazidə kiçik hərbi dəstələrin yerləşdirilməsi planlaşdırılır.
Digər mümkün ssenari isə "anarxizasiya" adlandırılıb. Bu halda paytaxt Karakasda iğtişaşların yaradılması və təhlükəsizlik xidmətləri ilə hakim partiyanın silahlı tərəfdarlarından istifadə etməklə ölkənin "idarəolunmaz vəziyyətə" gətirilməsi nəzərdə tutulur.
ABŞ mediası son vaxtlar Vaşinqtonun Venesuela ərazisinə yaxın vaxtlarda zərbələr endirməyə başlaya biləcəyi barədə məlumatlar yayıb. ABŞ Prezidenti Donald Tramp da Venesueladan quru yolu ilə həyata keçirilən narkotik qaçaqmalçılığına qarşı mübarizənin "çox tezliklə" başlayacağını bildirib, lakin mümkün hərbi əməliyyatlarla bağlı detalları açıqlamayıb.
