BAKI, AzerVoice, Orxan Qədirzadə
Xorvatiya polisi 28 noyabrda Zaqrebdə yaralanan rahibə Maria Zrnonun “müsəlman miqrant tərəfindən hücuma məruz qalması” barədə iddiasını təkzib edib. Aparılan istintaq göstərib ki, 35 yaşlı qadın xəsarətləri özünə qəsdən yetirib.
AzerVoice xəbər verir ki, Zaqreb Polis İdarəsinin məlumatına görə, hadisə günü bir neçə şahidin dindirilməsi və geniş araşdırmalar nəticəsində müəyyən olunub ki, rahibənin yaralanması üçüncü şəxs tərəfindən törədilməyib.
Zrno 1 dekabrda xəstəxanadan çıxdıqdan sonra polis bölməsinə gələrək “tanımadığı kişinin bıçaqladığını” iddia etmişdi. Lakin araşdırma zamanı əldə olunan yeni sübutlar onun ifadəsinin həqiqətə uyğun olmadığını üzə çıxarıb. Polis müəyyən edib ki, Zrno hadisədən əvvəl Zaqrebdəki mağazalardan birindən bıçaq alıb və xəsarətləri özü yetirib.
Bu səbəbdən onun barəsində “yalan məlumat verməklə cinayəti uydurmaq” maddəsi ilə prokurorluğa müraciət ediləcəyi bildirilib.
Hadisə baş verdikdən sonra Zrno, hücumun guya “Allahu Əkbər” deyə qışqıran bir kişi tərəfindən dini motivlərlə törədildiyini irəli sürmüşdü. Lakin Katolik Kilsəsi sonradan ilkin emosional açıqlamalarını geri götürərək vurğulayıb ki, polis istintaqı belə bir hücumun izinə rast gəlməyib.
Maria Zrno Xorvatiyada futbol sevgisi və “Laudato TV”də idman proqramlarındakı iştirakı ilə tanınırdı. Onun Dünya Çempionatı zamanı başladığı “Milli komanda üçün dua” təşəbbüsü ölkə üzrə geniş dəstək qazanmışdı.
