BAKI, AzerVoice
Sülh Şurası mənim iştirak edəcəyim ən vacib təşəbbüslərdən biridir.
AzerVoice xəbər verir ki, bu barədə ABŞ Prezidenti Donald Tramp Vaşinqtonda Sülh Şurasının ilk iclasında çıxışı zamanı bildirib.
"Bu, Sülh Şurası adlanır və demək asan, lakin tətbiq etmək çətindir. Amma biz bunu həyata keçirəcəyik və çox yaxşı iş görürük. Bizimlə olan bəzi liderlər cəmi ilk ildə mənə çox kömək etdilər. Çoxlu dostlar qazandım və sizin burada olduğunuza görə minnətdaram. Bunlar gözəl insanlardır. Bunlar görkəmli liderlərdir.
Sülh Şurası, iştirak edəcəyimi düşündüyüm ən vacib və mənalı səylərdən biridir. Biz artıq çox şeyə nail olmuşuq və həqiqətən də, ölkələrində müharibələrə son qoymaq üçün birlikdə çalışan insanlarla çox işləmişəm. Bu müharibələrin bəziləri 32 il davam etdi - 32, 34 və 37 il - bu, çox uzun müddətdir. Və biz onları hər biri təxminən iki günə başa vurduq. Amma hələ də görüləsi işlərimiz var və biz bunu edirik. Qəzzada vəziyyət çox çətindir", - o deyib.
Xatırladaq ki, bu il yanvarın 16-da Tramp Sülh Şurası adlı beynəlxalq təşkilat yaratmaq qərarını elan etmiş və Azərbaycan Respublikasını təsisçi üzv olmağa dəvət edib
Azərbaycan bu dəvəti qəbul edib və Amerika tərəfini Sülh Şurasının təsisçi üzvü olmaq niyyəti barədə məlumatlandırıb.
Yanvarın 22-də Davosda "Sülh Şurası Xartiyası"nın imzalanma mərasimi keçirilib (Board of Peace Charter).
Prezident İlham Əliyev və tədbirdə iştirak edən digər dövlət və hökumət başçıları "Sülh Şurası Xartiyası"nı imzalayıblar.
