BAKI,VOA, Fərid Mikayılov
İran Xarici İşlər Nazirliyi ABŞ ilə mümkün aralıq razılaşma barədə yayılan məlumatları əsassız adlandırıb.
VOA xəbər verir ki, İran Xarici İşlər Nazirliyinin sözçüsü İsmayıl Bəqai bildirib ki, Vaşinqtonla nüvə danışıqları ətrafında müxtəlif ehtimalların səsləndirilməsi yeni deyil, lakin dövriyyədə olan iddiaların heç biri təsdiqlənmir.
“Biz heç bir fərziyyəni təsdiqləmirik. Danışıqların detalları yalnız danışıqlar otağında müzakirə olunur. ABŞ ilə aralıq razılaşma barədə yayılan məlumatların əsası yoxdur”– deyə o vurğulayıb.
Sözçü ABŞ nümayəndəsi Stiv Uitkof tərəfindən İranın nüvə silahı əldə etməyə yaxın olduğu barədə səsləndirilən fikirləri də rədd edib. Onun sözlərinə görə, ABŞ rəsmilərinin ziddiyyətli bəyanatları yeni deyil və bu məsələyə qiyməti İran ictimaiyyəti və regional siyasi dairələr verməlidir.
Bəqai qeyd edib ki, tərəflərdən birinin digərini birtərəfli şəkildə öz tələblərini qəbul etməyə məcbur etmək məqsədi daşıyan danışıqlar nəticə verməyəcək.
“Biz mövqeyimizin legitimliyinə inanırıq və nüvə sahəsində, eləcə də sanksiyaların aradan qaldırılması məsələsində əsaslı tələblərimizə söykənərək prosesi davam etdirəcəyik” – deyə o əlavə edib.
Bəqai Rafael Qrossi tərəfindən səsləndirilən yoxlamalar və zədələnmiş obyektlərlə bağlı şərtlərə dair fikirlərə də münasibət bildirib. O qeyd edib ki, İran bu cür ilkin şərtləri qəbul etmir.
Sözçü əlavə edib ki, Tehran 2025-ci ildə dinc məqsədli nüvə obyektlərinə dair yoxlamalar üzrə öhdəliklərini yerinə yetirib və Beynəlxalq Atom Enerjisi Agentliyi ilə tam əməkdaşlıq edib. Lakin o vurğulayıb ki, xarici hərbi hücumlara məruz qalmış obyektlərlə bağlı məsələlər üçün beynəlxalq səviyyədə müəyyən edilmiş protokol mövcud deyil.
