BAKI,VOA, Fərid Mikayılov
ABŞ kəşfiyyat icmasının 2026-cı il üzrə illik təhdid qiymətləndirməsinə əsasən, Çin Tayvan üzərində nəzarəti ələ keçirmək niyyətini qorusa da, 2027-ci ildə hərbi müdaxilə planlaşdırmır və bu istiqamətdə konkret zaman qrafiki müəyyən etməyib.
VOA xəbər verir ki, Pekin Tayvanla birləşməyə nail olmaq üçün ilk növbədə hərbi olmayan yolları üstün tutur.
Çin rəhbərliyi mümkün qərarlarında Çin Xalq Azadlıq Ordusunun hazırlıq səviyyəsini, Tayvandakı siyasi vəziyyəti və ABŞ-ın müdaxilə ehtimalını nəzərə alacaq.
Qeyd edilir ki, Çin ordusu son illərdə Tayvan ətrafında hərbi təlimlərin miqyasını və intensivliyini artırsa da, bu proses qeyri-bərabər inkişaf edir və ciddi risklər hələ də qalmaqdadır.
Hesabatda vurğulanır ki, Tayvana qarşı mümkün hərbi əməliyyat qlobal iqtisadiyyata da ciddi təsir göstərə bilər. Belə ki, Tayvan yarımkeçiricilər istehsalında dünya liderlərindən biridir və qlobal ticarətin mühüm hissəsi Tayvan boğazından keçir.
ABŞ tərəfi bildirir ki, hətta Vaşinqtonun birbaşa iştirakı olmadan belə, belə bir münaqişə texnologiya təchizat zəncirlərində pozuntulara və beynəlxalq bazarlarda qeyri-müəyyənliyə səbəb ola bilər.
Ekspertlər də hesab edir ki, Çin rəhbərliyinin Tayvanla birləşmə üçün konkret zaman planı yoxdur və bu məqsədə mümkün qədər güc tətbiq etmədən nail olmağa üstünlük verilir.
