BAKI,VOA
ABŞ Prezidenti Donald Tramp şənbə günü bəyan edib ki, Birləşmiş Ştatlar ilk dəfə olaraq Səudiyyə Ərəbistanı Krallığını beşinci nəsil F-35 qırıcı təyyarələri ilə təmin edəcək.
VOA xəbər verir ki, Mayamidə keçirilən investisiya forumunda çıxış edən Tramp "Biz ilk dəfə olaraq Krallığın NATO-dan kənar əsas müttəfiq olduğunu elan etdik və ilk dəfə olaraq F-35-lərin Səudiyyə Ərəbistanına satılmasına razılıq verdik. F-35 təyyarələri möhtəşəmdir və biz onları çox münasib qiymətə satırıq".-deyə bildirib.
Bu elan Trampın 2025-ci ilin noyabrında, Səudiyyə Ərəbistanının vəliəhd şahzadəsi Məhəmməd bin Salmanı Ağ Evdə qəbul etməyə hazırlaşdığı vaxt verdiyi bəyanatların davamıdır. Noyabrın 18-də vəliəhd şahzadəni Ağ Evdə qəbul edən Tramp bu mövqeyini bir daha təsdiqləmişdi.
ABŞ mediasının hesabatlarına görə, bu sövdələşmə müəyyən çətinliklərlə, xüsusən də İsrailin bu satışa razılıq verməməsi ilə üzləşə bilər. Lakin Trampın bugünkü elanı, ABŞ və İsrailin İrana qarşı apardığı müharibənin ardıcıl 28-ci günündə regionda hərbi eskalasiyanın davam etdiyi bir vaxtda sazişin icrasında qərarlı olduğunu təsdiqləyir.
Qeyd edək ki, F-35 qırıcıları dünyanın en müasir döyüş təyyarələri hesab olunur və ixracı ciddi nəzarət altında olan qabaqcıl texnoloji imkanlara malikdir. Vaşinqtonun bu satışa razılıq verməsi, NATO-dan kənar əsas müttəfiqi olan Səudiyyə Ərəbistanı ilə müdafiə sahəsində əməkdaşlığın gücləndirilməsi çərçivəsində atılan strateji addımdır.
