BAKI,VOA, Fərid Mikayılov
ABŞ müdafiə strukturları İranla bağlı vəziyyətdə dəstək verməyən bəzi NATO ölkələrinə qarşı tədbirlər paketini nəzərdən keçirir.
VOA xəbər verir ki, ABŞ müdafiə dairələrində hazırlanmış sənəddə bəzi NATO ölkələrinə qarşı konkret tədbirlər təklif olunub.
Məlumata görə, Pentaqon tərəfindən müzakirə edilən variantlar arasında İspaniyanın NATO çərçivəsində iştirakının müvəqqəti dayandırılması və “problemli” hesab edilən ölkələrin alyans daxilində mühüm vəzifələrə çıxışının məhdudlaşdırılması yer alır.
Bundan əlavə, sənəddə ABŞ-ın Böyük Britaniyaya Folklend adaları ilə bağlı verdiyi diplomatik dəstəyin yenidən nəzərdən keçirilməsi ehtimalı da qeyd olunur. Bu ərazilər Argentina sahilləri yaxınlığında yerləşir və uzun illərdir mübahisə mövzusudur.
Eyni zamanda, sənəddə ABŞ-ın NATO-dan çıxması ilə bağlı hər hansı planın olmadığı vurğulanır.
Məsələyə münasibət bildirən Pentaqon sözçüsü bildirib ki, bəzi müttəfiqlərin ABŞ-a yetərli dəstək göstərməməsi narazılıq yaradıb. Donald Tramp isə daha əvvəl açıqlamasında NATO müttəfiqlərinin ABŞ-a lazımi dəstəyi vermədiyini qeyd edib.
