BAKI,VOA, Orxan Qədirzadə
Qəzzaya humanitar yardım aparan “Azadlıq” donanmasının iştirakçıları İsrailin müdaxiləsindən sonra Yunanıstana məxsus Girit adasına çıxarılıb.
VOA xəbər verir ki, İsrail hərbi qüvvələri beynəlxalq sularda humanitar missiya ilə hərəkət edən Beynəlxalq Azadlıq donanmasının gəmilərinə müdaxilə edərək aktivistləri nəzarətə götürüb.
Məlumata əsasən, donanma 12 aprel 2026-cı ildə İspaniyanın Barselona şəhərindən yola düşüb. Daha sonra İtaliyanın Siciliya adasında əlavə iştirakçıların qoşulması ilə 60-dan çox gəmi ilə fəaliyyətini davam etdirib. Aprelin 29-na keçən gecə Girit adası yaxınlığında beynəlxalq sularda İsrail qüvvələrinin müdaxiləsi qeydə alınıb.
Bildirilir ki, donanmada 39 ölkədən 345 nəfər iştirak edib və onların arasında Türkiyə vətəndaşları da olub. Hadisə beynəlxalq hüquq və humanitar missiyalara müdaxilə baxımından geniş müzakirələrə səbəb olub.
Qeyd edək ki, “Azadlıq” donanmasının əvvəlki – 2025-ci ilin sentyabrında baş tutan ilk təşəbbüsü zamanı da İsrail qüvvələri tərəfindən oxşar müdaxilə həyata keçirilmişdi.
