BAKI,VOA Orxan Qədirzadə
Fransanın keçmiş prezidenti Nikola Sarkozinin 2007-ci il prezident seçki kampaniyasının Liviyadan qeyri-qanuni maliyyələşdirilməsi ilə bağlı iş üzrə apellyasiya məhkəməsində yekun müdafiə çıxışlarına başlanılıb.
VOA xəbər verir ki, iş üzrə məhkəmə prosesi təxminən iki aydır davam edir və yaxın günlərdə prokurorluğun yekun cəza tələblərini açıqlayacağı gözlənilir.
Nikola Sarkozi daha əvvəl bu iş üzrə təqsirli bilinərək 5 il həbs cəzasına məhkum edilmişdi. Ona qarşı dərhal həbs qərarı çıxarılsa da, sonradan apellyasiya prosesi müddətində məhkəmə nəzarəti altında azadlığa buraxılmışdı.
Fransa prokurorluğu əvvəlki prosesdə Sarkozi üçün 7 il həbs, 300 min avro cərimə və 5 il dövlət vəzifəsi tutmaq qadağası tələb etmişdi. Keçmiş prezident korrupsiya, qeyri-qanuni seçki maliyyələşməsi, dövlət vəsaitlərinin qanunsuz istifadəsi və cinayət sövdələşməsi ittihamları ilə üzləşir.
İttihama əsasən, Sarkozi keçmiş daxili işlər naziri Bris Ortefö və Yelisey Sarayının sabiq baş katibi Klod Gean ilə birlikdə Liviya rəhbərliyi ilə gizli maliyyə razılaşması əldə edib. İddialara görə, bu sxemdə Fransa-Livan əsilli vasitəçi Ziyad Təkiəddinin hesablarından istifadə olunub.
İş üzrə ən diqqətçəkən məqamlardan biri də Liviyanın keçmiş təhlükəsizlik rəsmisi Abdullah Sənusinin hüquqi statusu ilə bağlıdır. Fransa məhkəməsi onu 1989-cu ildə Almaniyanın UTA aviaşirkətinə məxsus təyyarənin partladılması ilə bağlı qiyabi şəkildə ömürlük həbsə məhkum etmişdi. Həmin terror aktında 170 nəfər, o cümlədən 54 Fransa vətəndaşı həlak olmuşdu.
Apellyasiya prosesində müdafiə tərəfi daxilində parçalanmaların yarandığı bildirilir. Sarkozi məhkəmə zamanı bir neçə dəfə keçmiş yaxın silahdaşı Klod Geanın etibarlılığını sual altına alıb. Sağlamlıq problemlərinə görə məhkəməyə qatıla bilməyən Gean isə məhkəməyə göndərdiyi məktublarda Sarkozinin bəzi ifadələri ilə ziddiyyət təşkil edən məlumatlar təqdim edib.
Geanın sözlərinə görə, 2007-ci ildə Tripolidə keçirilən şam yeməyi zamanı Liviya lideri Müəmmər Qəddafi Abdullah Sənusi məsələsini yenidən gündəmə gətirib və Sarkozi bu mövzuya xüsusi diqqət yetirib. Bu açıqlama müdafiə tərəfinin mövqeyini zəiflədən yeni detal kimi qiymətləndirilir.
Sarkozinin vəkilləri isə ittihamları zəiflətmək üçün yeni maliyyə sənədləri təqdim ediblər. Müdafiə tərəfi iddia edir ki, sənədlər Ziyad Təkiəddin ilə Sənusi ailəsi arasında rüşvət sxemini ortaya çıxarır və bunun Sarkozinin seçki kampaniyasına aidiyyəti yoxdur.
Məhkəmənin yaxın həftələrdə yekun qərarını açıqlaması gözlənilir. Bu proses Fransa siyasi tarixinin ən qalmaqallı korrupsiya işlərindən biri kimi qiymətləndirilir.
