BAKI,VOA Orxan Qədirzadə

ABŞ dövlət katibi Marko Rubio ABŞ-ın Suriya üzrə xüsusi nümayəndəsi vəzifəsini icra edən Tom Barak üçün müəyyən edilmiş rəsmi mandat müddətinin başa çatdığını açıqlayıb.

Marko Rubio sosial şəbəkədə paylaşdığı açıqlamada bildirib ki, Tom Barak Suriya üzrə xüsusi nümayəndə kimi fəaliyyət göstərdiyi müddətdə ABŞ administrasiyasına mühüm töhfələr verib.

"Tom Barak Suriya üzrə xüsusi nümayəndəmiz kimi əvəzsiz rol oynayıb. Bu vəzifənin rəsmi müddəti başa çatsa da, o, Prezident Donald Tramp administrasiyasında həm Suriya, həm də İraq istiqamətləri üzrə mərkəzi rol oynamaqda davam edəcək", – deyə Rubio qeyd edib.

Dövlət katibi vurğulayıb ki, Tom Barakın region üzrə geniş əlaqələri və qazandığı təcrübə onu ABŞ-ın Yaxın Şərq strategiyasının vacib simalarından birinə çevirir.

Açıqlama Tom Barakın mandat müddətinin başa çatdığı vaxta təsadüf edib. O, 2025-ci ilin may ayında həm ABŞ-ın Türkiyədəki səfiri, həm də Suriya üzrə xüsusi nümayəndəsi vəzifələrinə təyin olunmuşdu.

Diplomat fəaliyyət göstərdiyi dövrdə Vaşinqtonun Suriyanın yeni rəhbərliyi ilə bağlı siyasətinin formalaşdırılmasında mühüm rol oynayıb. Məlumata görə, onun fəaliyyəti çərçivəsində Suriyaya tətbiq olunan bəzi sanksiyaların yumşaldılması istiqamətində təşəbbüslər, eləcə də Dəməşq hökuməti ilə Suriya Demokratik Qüvvələri arasında vasitəçilik səyləri həyata keçirilib.

ABŞ administrasiyası hələlik Tom Barakın gələcək fəaliyyətinin konkret formatı ilə bağlı əlavə təfərrüatlar açıqlamayıb. Bununla belə, Vaşinqton onun Yaxın Şərq siyasətində, xüsusilə Suriya və İraq istiqamətlərində mühüm təsir imkanlarını qoruyacağını vurğulayır.

Müşahidəçilər hesab edirlər ki, Tom Barakın rəsmi xüsusi nümayəndə statusunun başa çatmasına baxmayaraq, onun administrasiya daxilində saxlanılması ABŞ-ın Suriya siyasətində ardıcıllığı təmin etmək məqsədi daşıyır.