BAKI,VOA, Fərid Mikayılov
ABŞ-ın Müharibə naziri Pit Heqset ABŞ və İran arasında imzalanan "İslamabad Anlaşma Memorandumu" ilə bağlı olduqca sərt və kəskin bəyanatlar verib. Brüsseldə keçirilən NATO Müdafiə Nazirləri Toplantısından sonra hava limanının apronunda mətbuata açıqlama verən Heqset, Tehran rejimi ilə heç bir "etimad" münasibətinin olmadığını və bundan sonrakı hər bir addımın yalnız İranın praktiki fəaliyyətinə əsasən qiymətləndiriləcəyini vurğulayıb.
VOA xəbər verir ki, nazir bu sənədin əvvəlki nüvə sazişlərindən köklü şəkildə fərqləndiyini bildirərək, razılaşmanın ABŞ-ın hərbi qüdrəti və qətiyyətli addımları sayəsində reallaşdığını qeyd edib:
"Sabiq Prezident Barak Obama dövründəki nüvə sazişi davamlı yalvarışlar və sonsuz müzakirələr nəticəsində ortaya çıxmışdı. Bu memorandum isə aylarla davam edən bombardmanların və keçilməz hərbi blokadanın məhsuludur. İran masaya oturmağa və şərtləri qəbul etməyə məcbur qaldığı bir mövqeyə sıxışdırıldı".
İranın heç bir halda nüvə və strateji silahlara sahib ola bilməyəcəyini xatırladan Heqset, Vaşinqtonun "etibar et və yoxla" prinsipini tamamilə kənara qoyduğunu bəyan edib:
"Burada heç bir güvəndən söhbət gedə bilməz. Bizim edəcəyimiz hər şey yalnız yoxlamaq, yoxlamaq və bir daha yoxlamağa əsaslanacaq. Əgər İran verdiyi sözləri tutmasa, Müdafiə Nazirliyi hərbi əməliyyatları dərhal yenidən başlatmağa tam hazırdır".
