BAKI,VOA,Yusif Şərifzadə
İsrail Baş naziri Benyamin Netanyahu ölkəsinin ABŞ-dan hərbi asılılığını azaltmalı olduğunu bildirib.
VOA xəbər verir ki, Netanyahu bu fikirləri keçən həftə əsgərlərə müraciəti zamanı səsləndirib. Onun çıxışının videoyazısı bu gün Baş nazirlik ofisi tərəfindən yayımlanıb.
Netanyahu qeyd edib ki, İsrail ABŞ-ın dəstəyini yüksək qiymətləndirir, lakin öz müstəqil silah sistemlərini inkişaf etdirməlidir.
O bildirib ki, ölkə xarici hərbi yardım asılılığından çıxmalı və tam müstəqil silahlanma infrastrukturu qurmalıdır.
Məlumata görə, bu açıqlama ABŞ-ın İsrailə Livanın cənubundakı hərbi əməliyyatları məhdudlaşdırmaqla bağlı artan təzyiqləri fonunda verilib.
Netanyahu isə İsrail qoşunlarının Livanın cənubunda qalmağa davam edəcəyini və “Hizbullah infrastrukturunu məhv edəcəyini” bildirib.
