BAKI,VOA,Yusif Şərifzadə
ABŞ Prezidenti Donald Tramp İranla bağlı hərbi qarşıdurma zamanı NATO müttəfiqlərindən dəstək istəməklə onları sınağa çəkdiyini açıqlayıb. O, eyni zamanda alyans üzvlərini müdafiə xərclərini kifayət qədər artırmamaqda tənqid edib.
VOA xəbər verir ki, Donald Tramp Ankarada keçirilən NATO Zirvə Toplantısı ərəfəsində jurnalistlərə açıqlamasında İranla bağlı müharibə zamanı müttəfiqlərdən dəstək istəməsinin məqsədinin onların mövqeyini yoxlamaq olduğunu bildirib.
ABŞ Prezidenti NATO üzvlərinin bir hissəsinin müdafiə sahəsinə kifayət qədər vəsait ayırmadığını deyərək bu məsələdə narazılığını ifadə edib. O, həmçinin ABŞ və İsrailin İrana qarşı həyata keçirdiyi hərbi əməliyyat zamanı alyansın bəzi üzvlərinin Vaşinqtona lazımi dəstəyi vermədiyini iddia edib.
Tramp bildirib ki, NATO ölkələrinin kollektiv təhlükəsizlik öhdəliklərini daha ciddi şəkildə yerinə yetirməsi və müdafiə xərclərini artırması vacibdir. Onun sözlərinə görə, bu məsələ alyansın gələcək fəaliyyəti baxımından əsas prioritetlərdən biridir.
