BAKI,VOA,Yusif Şərifzadə
"Bavi" qasırğası şənbə günü gecə saatlarında Çinin şərqində yerləşən Taycou şəhərinə çatıb. Qasırğa bundan əvvəl Yaponiyanın cənubundakı Sakişima adalarına təsir göstərib, Tayvanın şimalından keçərək bölgədə güclü yağış və küləyə səbəb olub.
VOA xəbər verir ki, Çin Milli Meteorologiya Mərkəzinin məlumatına görə, qasırğa yerli vaxtla saat 23:20-də Taycou sahillərinə çatıb. Həmin vaxt küləyin davamlı sürəti saatda təxminən 144 kilometr olub.
Rəsmi məlumatlara əsasən, Tzıciyan əyalətində 1,7 milyondan çox sakin təhlükəsizlik məqsədilə təxliyə edilib. Bununla yanaşı, Futszyan əyalətindən 100 mindən çox, Pekindən 100 mindən artıq, Şanxaydan isə təxminən 34 min nəfər təhlükəsiz ərazilərə köçürülüb.
Sinoptiklər bildirirlər ki, qasırğa zəifləməyə başlasa da, özündə daşıdığı böyük həcmdə rütubət səbəbindən leysan yağışları və daşqın təhlükəsi hələ də yüksək olaraq qalır.
Yaponiya və Tayvanda indiyədək insan itkisi qeydə alınmasa da, Filippində qasırğanın gücləndirdiyi musson yağışları nəticəsində azı 17 nəfər həyatını itirib.
Tayvanın Fövqəladə Hallar Xidməti 113 nəfərin müxtəlif xəsarətlər aldığını açıqlayıb. Yaralanmaların əksəriyyətinin motosiklet və velosipeddən yıxılma, eləcə də güclü küləyin aşırdığı əşyaların insanlara dəyməsi nəticəsində baş verdiyi bildirilib.
Tayvanda əsasən dağlıq ərazilərdən 14 mindən çox sakin təxliyə olunub. Ada üzrə 920 beynəlxalq və 282 daxili aviareys ləğv edilib. Əksər şəhər və rayonlarda şənbə günü qeyri-iş günü elan olunub, məktəblər və dövlət müəssisələri fəaliyyətini dayandırıb. Bununla belə, paytaxt Taypeydə bəzi restoranlar və mağazalar açıq qalıb, sürətli dəmir yolu isə məhdud qrafiklə fəaliyyətini davam etdirib.
Taypey yaxınlığındakı Beytou bölgəsində saatda təxminən 100 kilometr sürətlə əsən külək ağacları aşırıb və çaylarda suyun səviyyəsinin yüksəlməsinə səbəb olub.
Çinin Vencou şəhərində yaşayan sakinlər də qasırğaya hazırlıq gördüklərini bildiriblər. Onlar hökumətin qabaqlayıcı tədbirlər gördüyünü qeyd edərək ciddi narahatlıq keçirmədiklərini, lakin yaşlı ailə üzvlərinin təhlükəsizliyi üçün əlavə ehtiyat tədbirləri gördüklərini deyiblər.
