BAKI,VOA,Yusif Şərifzadə
ABŞ Dövlət Departamentinin rəsmisi İsrail və Livan arasında Romada keçirilən danışıqların məhsuldar olduğunu bildirib.
VOA xəbər verir ki, ABŞ rəsmisi “Reuters” agentliyinə açıqlamasında çərşənbə axşamı keçirilən görüşlərdə müsbət müzakirələrin aparıldığını deyib.
Daha əvvəl İsrail ABŞ vasitəçiliyi ilə əldə olunan razılaşma çərçivəsində Livanın cənubundakı iki ərazidən qoşunlarını çıxarmaq planlarını həyata keçirməyə hazır olduğunu açıqlamışdı.
Romadakı danışıqlar iyunun 26-da Vaşinqtonda keçirilən görüşdən sonra baş tutub. Həmin görüşdə Livanda müharibənin dayandırılması, silahlı qrupların tərksilah edilməsi, Livan ordusunun ölkənin cənubuna yerləşdirilməsi və İsrail qüvvələrinin mərhələli şəkildə geri çəkilməsi ilə bağlı razılaşma əldə olunmuşdu.
Razılaşmada silahlı qrupların tərksilahı ilə bağlı müddəanın əsasən Hizbullahı nəzərdə tutduğu bildirilir.
ABŞ vasitəçiliyi ilə keçirilən bu yeni danışıqların məqsədi əldə olunan razılaşmanın icra mexanizmlərini müzakirə etməkdir.
Görüşlərin daha bir mərhələsinin sabah davam edəcəyi gözlənilir.
