BAKI,VOA,Yusif Şərifzadə
ABŞ-nin vitse-prezidenti Ceyms Devid Vensin İsraillə bağlı son açıqlamaları Respublikaçılar Partiyası daxilində İran siyasəti ətrafında fikir ayrılıqlarının dərinləşdiyini göstərir.
VOA xəbər verir ki, bu qiymətləndirmə "Əl-Cəzirə" telekanalında yayımlanan təhlildə səsləndirilib.
Təhlildə bildirilir ki, İsrailin İranla bağlı danışıqlara təsir göstərmək cəhdləri Prezident Donald Trampın tərəfdarları arasında da müzakirələrə səbəb olur.
Müəllifin fikrincə, məhz bu səbəbdən Ceyms Devid Vens ABŞ-də geniş auditoriyaya malik podkastlardan birinə qatılaraq İsraili İrana dair danışıqları pozmağa yönəlmiş gizli fəaliyyət aparmaqda ittiham edib.
Təhlildə qeyd olunur ki, vəzifədə olan vitse-prezidentin belə ittihamı açıq şəkildə səsləndirməsi ABŞ siyasətində nadir hadisə hesab olunur.
Bununla yanaşı, ABŞ Nümayəndələr Palatasında Demokratlar Partiyasının 103 üzvünün İsrailə ayrılan 3,3 milyard dollar həcmində yardımın dayandırılmasını dəstəkləməsi də Vaşinqtonda siyasi mövqelərin dəyişdiyinin göstəricisi kimi qiymətləndirilir.
Təhlildə həmçinin iddia olunur ki, Donald Tramp ötən həftə İsrailin Baş naziri Benyamin Netanyahu ilə telefon danışığında İsrail qüvvələrinin Livan və Suriyadan çıxmasının vaxtının çatdığını bildirib. Lakin İsrailin müdafiə naziri sonradan ordunun həmin əraziləri tərk etməyəcəyini açıqlayıb.
Müəllif hesab edir ki, yaxın günlərdə Ağ Evin bu məsələyə münasibətinin necə olacağı ABŞ–İsrail münasibətlərinin gələcək istiqaməti baxımından mühüm əhəmiyyət daşıyacaq.
Qeyd: Xəbərdə yer alan qiymətləndirmələr və nəticələr təhlil xarakteri daşıyır və müəllifin şərhidir.
