BAKI,VOA,Yusif Şərifzadə
Kanada hökuməti işğal altındakı İordan çayının qərb sahilində israilli məskunlaşmaçıların zorakılığının artmasını pisləyərək, qeyri-qanuni məskunlaşma məntəqələrinin genişləndirilməsinin dayandırılmasına çağırıb.
VOA xəbər verir ki, Kanadanın Xarici İşlər Nazirliyi X platformasında yaydığı açıqlamada bildirib ki, İsrailin məskunlaşma fəaliyyətinin genişlənməsi "dayandırılmalıdır".
Nazirliyin bəyanatında qeyd olunub ki, "bu məskunlaşma məntəqələri beynəlxalq hüquqa görə qanunsuzdur və sülh, təhlükəsizlik və sabitlik perspektivlərini zəiflədir".
Birləşmiş Millətlər Təşkilatının İnsan Hüquqları üzrə Ali Komissarlığının Ofisi isə bildirib ki, işğal altındakı Qərb sahilində israilli məskunlaşmaçıların hücumları və qeyri-qanuni məskunlaşma məntəqələrinin genişləndirilməsi indiyədək ən yüksək səviyyəyə çatıb.
Hüquq müdafiə təşkilatlarının məlumatına görə, 2023-cü ilin oktyabrından bəri İordan çayının qərb sahilində 1 100-dən çox fələstinli həyatını itirib.
İsrail hökuməti Kanadanın son bəyanatı ilə bağlı hələlik rəsmi münasibət bildirməyib.
