BAKI,VOA,Yusif Şərifzadə
ABŞ Prezidenti Donald Tramp Rusiya Prezidenti Vladimir Putinin NATO üzvü olan heç bir ölkəyə hücum etməyəcəyini bildirib. Tramp bu barədə cümə axşamı Ağ Evdə jurnalistlərin suallarını cavablandırarkən danışıb.
VOA xəbər verir ki, Tramp “O, NATO ərazisinə hücum etməyəcək” deyərək Rusiyanın alyans ölkələrindən birinə qarşı hərbi əməliyyata başlayacağı ehtimalını rədd edib. ABŞ Prezidenti günün əvvəlində verdiyi başqa açıqlamada da belə bir hücumun baş verməyəcəyinə əmin olduğunu bildirib.
Tramp eyni zamanda ABŞ Mərkəzi Kəşfiyyat İdarəsinin direktoru Con Retkliffin Rusiya rəsmilərinə NATO ölkələrinə hücum etməmək barədə xəbərdarlıq çatdırdığına dair yayılan məlumatların əhəmiyyətini azaldıb.
ABŞ Prezidentinin sözlərinə görə, Retkliff rusiyalı həmkarı ilə müntəzəm olaraq, təxminən altı aydan və ya bir ildən bir görüşür. Tramp tərəflər arasında yaxşı münasibətlərin olduğunu və son təmasın qeyri-adi xarakter daşımadığını bildirib.
Tramp Retkliffin Moskvaya hər hansı xüsusi xəbərdarlıq və ya mesaj çatdırmaq məqsədilə göndərilmədiyini vurğulayıb. Onun sözlərinə görə, görüş zamanı Rusiya tərəfinə xüsusi mesaj verilməyib.
Bununla yanaşı, Avropa və ABŞ kəşfiyyat qurumları uzun müddətdir Rusiyanın Avropada həyata keçirdiyi iddia olunan təxribat və açıq müharibə həddinə çatmayan fəaliyyətləri izləyirlər. Qərb rəsmiləri belə fəaliyyətlərin NATO daxilində birliyi zəiflətməyə və üzv ölkələrin Ukraynaya dəstək göstərmək iradəsinə təsir etməyə yönəldiyini bildirirlər.
