BAKI, AzerVoice
ABŞ Senatının Daxili Təhlükəsizlik və Hökumət İşləri Komitəsi
keçmiş prezident Donald Trampa qarşı 13 iyul 2024-cü il tarixində
törədilən sui-qəsd cəhdi ilə bağlı hesabatını açıqlayıb.
AzerVoice xəbər verir ki, Hesabatda
Gizli Xidmətin ciddi çatışmazlıqları və “səhlənkar səhvlər” olduğu
bildirilir.
Hesabat 75 min səhifəlik sənədlərin və təhlükəsizlik qüvvələri ilə aparılan müsahibələrin təhlili nəticəsində hazırlanıb. Sənəddə Trampın Pensilvaniyada keçirdiyi mitinqin planlaşdırılmasında və icrasında “bir sıra uğursuzluqların” olduğu qeyd edilir.
Senatın araşdırmasına görə, Gizli Xidmət dəfələrlə əlavə personal və resurs tələblərini rədd edib, mitinq zamanı şübhəli şəxsin müşahidə edildiyi barədə məlumat isə müvafiq təhlükəsizlik qrupları ilə bölüşülməyib.
Hesabatda həmçinin vurğulanır ki, federal, ştat və yerli təhlükəsizlik orqanları arasında ciddi koordinasiya və ünsiyyət çatışmazlığı olub. Hadisədən sonra heç bir yüksək vəzifəli şəxs işdən çıxarılmayıb, yalnız 6 nəfərə intizam cəzası tətbiq edilib. Hesabatda bu yanaşma "olduqca yüngül və qəbuledilməz" adlandırılıb.
Qeyd edək ki, Donald Tramp 2024-cü ilin 13 iyulunda Pensilvaniyanın Batler bölgəsində keçirilən seçki mitinqi zamanı silahlı hücuma məruz qalmışdı. Hadisə nəticəsində bir nəfər həyatını itirmiş, iki nəfər yaralanmışdı. Hücum edən 20 yaşlı Tomas Mettyu Kruks hadisə yerində öldürülmüşdü.
