BAKI, AzerVoice, Nailə Babazadə
Avropa İttifaqı (Aİ) Komissiyası üzv ölkələrə İsrail mallarına tətbiq olunan ticarət imtiyazlarının dayandırılmasını və İsrail rəsmilərinə sanksiyalar tətbiq edilməsini təklif edib.
AzerVoice xəbər verir ki, Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Kaja Kallas və Aİ Komissiyasının Ticarət üzrə üzvü Maros Sefcoviç Brüsseldə keçirdikləri birgə mətbuat konfransında İsrailə qarşı sanksiya təklifinin təfərrüatlarını açıqlayıblar.
Kallas bildirib ki, “İsrail hökumətinin Qəzzaya qarşı hücumu müharibənin yeni mərhələsidir və humanitar böhranı daha da dərinləşdirəcək”. O, aşırı sağçı İsrail nazirlərinə, işğal altında olan Fələstin torpaqlarını zəbt edən zorakı məskunlaşma sakinlərinə və onları dəstəkləyən qurumlara qarşı sanksiyalar paketi təqdim etdiyini açıqlayıb.
“Açıq demək istəyirəm ki, məqsəd İsraili cəzalandırmaq deyil, Qəzzadakı humanitar vəziyyəti yaxşılaşdırmaqdır”. - deyə Kallas əlavə edib.
O, bütün üzv ölkələrin Qəzzadakı vəziyyətin davam etdirilə bilməz olduğunu qəbul etdiyini vurğulayıb və bildirib ki, “Müharibə sona çatmalıdır, əzablar bitməli və bütün əsirlər azad edilməlidir. Bu məqsədə çatmaq üçün əlində olan bütün vasitələrdən istifadə etməliyik. Həmçinin, Qərbi Şəriada iki dövlətli həllin həyata keçirilməsini çətinləşdirən təhlükəli inkişafları da nəzərdən qaçırmamalıyıq”.
Kallas deyib: “Aİ Komissiyası ticarət imtiyazlarının qismən dayandırılmasına dair təklifi qəbul edib”. - deyə Kallas əlavə edib.
Aİ Komissiyasının Ticarət üzrə üzvü Maros Sefcoviç təklifin detalları barədə məlumat verərək bildirib ki, təklifə əsasən İsraillə ticarət sahəsində Avropa-Aralıq dənizi Müqaviləsinin əsas maddələri dayandırılacaq.
Sefcoviç qeyd edib: “İnsan hüquqları və demokratik prinsiplərə hörmət İsrail ilə Aİ arasında bağlanmış razılaşmanın əsas tərkib hissələridir. Təklif edilən dayandırma qərarı İsrailə tanınan üstünlükləri hədəfləyir. Bu üstünlüklər malların sərbəst hərəkəti, müəssisələrin yaradılması hüququ, xidmətlərin göstərilməsi, dövlət satınalmaları, rəqabət və əqli mülkiyyət hüquqlarını əhatə edir”.
O əlavə edib: “Bu o deməkdir ki, İsraildən Aİ-yə idxal olunan məhsullar Aİ bazarına üstün giriş hüququndan məhrum olacaq və bu mallara Aİ-nin azad ticarət sazişi olmayan digər üçüncü ölkələrə tətbiq etdiyi səviyyədə gömrük rüsumu tətbiq ediləcək”.
Qəzza bölgəsində davam edən humanitar böhran nəzərə alınaraq, bu tədbirin uyğun və nisbətli olduğunu vurğulayan Sefcoviç qeyd edib ki, qərar Aİ Şurasında ixtisaslaşmış çoxluqla qəbul ediləcək.
O əlavə edib ki, 2024-cü ildə Aİ ilə İsrail arasında ümumi ticarət həcmi 42,6 milyard avro olub və Aİ İsrailin ən böyük ticarət tərəfdaşıdır.
Sefcoviç deyib ki, təklif edilən qismən dayandırma qərarı getdikcə daha təcili hala gələn vəziyyətə verilən düşünülmüş cavabdır və Qəzzadakı humanitar böhranın sona çatmasının vaxtı çatıb.
Aİ Komissiyasının təklifi üzv ölkələr tərəfindən Aİ Şurasında müzakirə olunacaq və qəbul üçün ixtisaslaşmış çoxluq tələb olunacaq.
