BAKI, AzerVoice, Nailə Babazadə
Bazar ertəsi günü Tehran şəhərində Omanın Daxili İşlər Naziri Həmud bin Faysal əl-Busaidi ilə görüşən Pezeşkian iki qonşu ölkə arasındakı münasibətlərin “qardaşlıq, qarşılıqlı hörmət və xoş niyyət” əsasında qurulduğunu və regional çağırışlar zamanı bir-birlərini dəstəklədiklərini qeyd edib.
AzerVoice xəbər verir ki, İran prezidenti Məsud Pezeşkian Omanın bölgədə sülhün təmin olunması istiqamətində diplomatik səylərini alqışlayaraq, Tehranının Muskatla müxtəlif sahələrdə əməkdaşlığı genişləndirməyə hazır olduğunu bildirib.
Pezeşkian Omanı İran və ABŞ arasında danışıqları ev sahibliyi edib asanlaşdırmaqla konstruktiv roluna görə təşəkkür edib və ölkənin yanaşmasını “ağıllı və sülhpərvər” adlandırıb.
Pezeşkian həmçinin ölkəsinin Omanla elmi, iqtisadi, mədəni, sosial və siyasi sahələrdə əlaqələrini genişləndirməyə hazır olduğunu bildirib və ümidini ifadə edib ki, bu səfər iki ölkə arasında əlaqələrin daha da güclənməsinə töhfə verəcək.
Pezeşkian həmçinin Omanın Fələstinlilərə dəstək və İsrailin cinayətlərini qınayan mövqeyini yüksək qiymətləndirib və qeyd edib ki, əgər bütün müsəlman ölkələri belə bir mövqe sərgiləsəydi, bölgədə “ağrılı və təəssüf doğuran hadisələr” baş verməzdi.
Oman naziri Həmud bin Faysal əl-Busaidi isə İranla münasibətlərin “xüsusi, dərin və səmimi” olduğunu vurğulayıb. O, Pezeşkianın beş ay əvvəl Muskat səfərinə və orada əldə olunan razılaşmalara diqqət çəkərək, əməkdaşlıq üçün aydın bir yolun göstərildiyini bildirib.
Nazir əlavə edib ki, Oman İranla əlaqələri gücləndirmək üçün “qətiyyətli şəkildə” çalışmağa davam edəcək.
