BAKI, AzerVoice, Nailə Babazadə
Qətərin Baş naziri və Xarici işlər naziri Şeyx Məhəmməd bin Əbdürrəhman bin Casim Al-Thani bildirib ki, Fələstin xalqının maraqlarının effektiv şəkildə müdafiə edilməsi və idarəetmənin təmin olunması üçün vahid rəhbərlik əsas şərtdir. O, müvafiq fikirləri CNN-in aparıcısı Fərid Zakariyaya verdiyi müsahibədə dilə gətirib.
AzerVoice xəbər verir ki, baş nazir qeyd edib ki, Doha qətiyyətlə Fələstin Administrasiyasını (PA) Qəzza və İordan çayı qərb sahəsinin idarəçiliyinə cavabdeh yeganə qurum kimi görür. “Əslində biz istəyirik ki, Fələstin Administrasiyası Qəzza və Qərb Sahilinin idarəçiliyinə cavabdeh yeganə qurum olsun.”-deyə o qeyd edib.
Şeyx Məhəmməd bin Əbdürrəhman xatırladıb ki, hazırda FƏTH və PA daxil olmaqla bütün Fələstin fraksiyaları arasında danışıqlar gedir.
Məqsəd keçid dövründə Qəzzanı idarə edəcək, siyasi təsirdən uzaq texnokrat komitənin yaradılmasıdır: “Bu texnokrat komitə apolitik olacaq, keçid dövründə Qəzzaya nəzarət edəcək və müəyyən şəkildə Fələstin Administrasiyasına bağlı olacaq. İslahatlar həyata keçirildikdən sonra Fələstin Administrasiyası Qəzza və Qərb Sahilinin idarəçiliyini birgə üzərinə götürməlidir. Biz bu iki vahidi ayıra bilmərik - onlar bir vahiddirlər, gələcək Fələstin dövlətidir.”
Baş nazir çıxışında iki dövlətli həllin zəruriliyini də təkrar edib və bəzi siyasətçilərin fərqli həllərə dair ümidlərini “arzuolunan düşüncə” adlandıraraq belə qeyd edib: “Biz nə edirik, nə deyirik — bəzi siyasətçilərin, bəlkə də İsraildə, iki dövlətli həlldən başqa fərqli variantların olduğu barədə arzu dolu fikirləri var; amma iki dövlətli həlldən başqa çıxış yolu yoxdur.”
