BAKI, AzerVoice, Nailə Babazadə
İran Xarici İşlər Nazirliyinin sözçüsü İsmail Bəqai Kanadada keçirilən G7 xarici işlər nazirlərinin toplantısının yekun bəyanatında İran əleyhinə yer alan iddiaları əsassız, məsuliyyətsiz və qəbuledilməz adlandırıb.
AzerVoice xəbər verir ki, Bəqai bildirib ki, G7 üzv ölkələrinin məsuliyyətsiz mövqeyini təkrarlaması – üç Avropa ölkəsi və ABŞ-ın JCPOA-nın (Nüvə Razılaşması) mübahisələrin həlli mexanizmindən sui-istifadə edərək BMT Təhlükəsizlik Şurasının İranla bağlı daha əvvəl ləğv edilmiş qətnamələrini bərpa etməsi kimi qanunsuz və əsassız addımını dəstəkləmələri – beynəlxalq hüquqa zidd bir hərəkətin təsdiqlənməsi deməkdir.
O vurğulayıb ki, G7-nin mövqeyi heç bir şəkildə üç Avropa ölkəsi və ABŞ-ın qanunsuz və əsassız addımlarını legitimləşdirmir və ya haqlı çıxarmır.
İsrail rejimi və ABŞ tərəfindən İrana və onun dinc nüvə obyektlərinə qarşı həyata keçirilmiş qanunsuz hərbi hücumlara istinad edən sözçü, G7-nin ABŞ və İsrail rejimi tərəfindən törədilən birgə cinayətlərdən heç bir şəkildə bəhs etmədən İranı Atom Enerjisi üzrə Beynəlxalq Agentliklə əməkdaşlığa çağırmasını riyakar və müdaxiləçi adlandırıb.
O vurğulayıb ki, Birləşmiş Ştatlar 2018-ci ildə JCPOA-dan qanunsuz və birtərəfli qaydada çıxması və İranın dinc nüvə obyektlərinə hərbi hücumu səbəbilə hazırkı vəziyyətin əsas günahkarıdır.
Bəqai əlavə edib ki, üç Avropa ölkəsi ABŞ-ın ardınca gedərək öz öhdəliklərini yerinə yetirməməklə, həmçinin ABŞ və İsrail rejiminin İranın dinc nüvə obyektlərinə qarşı hərbi təcavüzünü dəstəkləməklə təkcə JCPOA üzrə öhdəliklərini kobud şəkildə pozmayıblar, həm də açıq-aşkar kötü niyyət göstərərək İranın diplomatiyanı irəli aparmaq üçün etdiyi bütün təşəbbüsləri və səyləri görməzlikdən gəliblər.
