BAKI, AzerVoice, Nailə Babazadə
Dekabr ayının sonlarında başlayan etiraz aksiyaları cümə axşamı etibarilə İranın 31 əyalətinin hamısına yayılıb. Paytaxt Tehranla yanaşı, Kirmanşah, Abadan, Təbriz və Şiraz kimi böyük şəhərlərdə minlərlə insan küçələrə çıxıb.
AzerVoice xəbər verir ki, Norveç mərkəzli İran İnsan Haqları (IHR) təşkilatı etirazların başladığı gündən bəri təhlükəsizlik qüvvələri tərəfindən azı 45 etirazçının, o cümlədən 8 uşağın öldürüldüyünü açıqlayıb.
Yerli mənbələr və rəsmi açıqlamalara görə isə aralarında təhlükəsizlik əməkdaşlarının da olduğu azı 21 nəfər həyatını itirib. İnsan haqları qrupları çərşənbə gününü 13 nəfərin ölümü ilə indiyədək “ən qanlı gün” kimi qiymətləndirib.
Etirazlara səbəb olan əsas amil İran rialının kəskin dəyər itirməsi və əsas ərzaq məhsullarının qiymətlərində həddindən artıq artım olub. Bildirilir ki, ərzaq qiymətləri ötən illə müqayisədə 70 faizdən çox, dərman qiymətləri isə təxminən 50 faiz artıb. İran Prezidenti Məsud Pezeşkian etirazçılara qarşı “maksimum təmkin” göstərilməsinə və dialoqa üstünlük verilməsinə çağırıb.
ABŞ Prezidenti Donald Tramp İran hakimiyyətini xəbərdar edərək, etirazçıların öldürülməsinin davam edəcəyi təqdirdə Vaşinqtonun “İranı çox sərt vuracağını” bildirib. Almaniya Xarici İşlər Nazirliyi də İran rəsmilərinin “həddindən artıq güc tətbiq etməsini” pisləyib.
Digər tərəfdən, sürgündə olan Vəliəhd Şahzadə Rza Pəhləvinin kütləvi etiraz çağırışından sonra Tehranda minlərlə insanın “Diktatora ölüm” şüarları ilə küçələrə axışdığı xəbər verilir.
