BAKI, AzerVoice, Nailə Babazadə
ABŞ Prezidenti Donald Tramp İranla hər hansı formada ticarət əlaqələri quran bütün ölkələrin ABŞ-la ticarətində 25 faiz dərəcəsində gömrük rüsumu ilə üzləşəcəyini bildirib.
AzerVoice xəbər verir ki, Tramp bu barədə "Truth Social" platformasında paylaşım edib. O bildirib ki, İran İslam Respublikası ilə iş görən istənilən ölkə dərhal qüvvəyə minmək şərtilə ABŞ-la apardığı bütün ticarət əməliyyatlarına görə 25 faiz rüsum ödəyəcək. Bu qərarın qəti olduğunu vurğulayan Tramp rüsumun tətbiqi üçün hansı hüquqi mexanizmdən istifadə ediləcəyi barədə əlavə təfərrüat verməyib.
İranın əsas ticarət tərəfdaşları arasında Çin, Türkiyə, İraq və Hindistan kimi ölkələr yer alır. Çinin Vaşinqtondakı səfirliyi bu qərarı sərt tənqid edərək birtərəfli sanksiyalara qarşı bütün lazımi tədbirləri görəcəklərini bəyan edib. Cənubi Koreya və Yaponiya rəsmiləri isə vəziyyəti yaxından izlədiklərini və ABŞ-ın konkret addımları bəlli olduqdan sonra müvafiq cavab verəcəklərini bildiriblər.
Bu qərar İranda 1979-cu il inqilabından bəri hakimiyyət üçün ən böyük sınaqlardan biri sayılan genişmiqyaslı aksiyalar fonunda qəbul edilib. Dekabrın 28-dən başlayan etirazlarda indiyədək 599 nəfərin həyatını itirdiyi bildirilir. Ağ Evin mətbuat katibi Karoline Leavitt diplomatiyanın hələ də ilk seçim olduğunu desə də, Tramp hərbi müdaxilə variantını da gündəmdə saxlayır.
Trampın bu sərt ticarət siyasəti ABŞ daxilində də hüquqi müstəvidə müzakirə olunur. Belə ki, ABŞ Ali Məhkəməsi hazırda Trampın tətbiq etdiyi bir sıra mövcud gömrük rüsumlarının ləğv edilməsi ehtimalını nəzərdən keçirir. Buna baxmayaraq, Vaşinqton administrasiyası Tehranın gəlir mənbələrini kəsmək üçün beynəlxalq təzyiqi maksimum həddə çatdırmaqda israrlıdır.
