BAKI, AzerVoice, Nailə Babazadə
ABŞ Prezidenti Donald Tramp Davos Dünya İqtisadi Forumu çərçivəsində "Qəzza Sülh Şurası" üçün imzaların atıldığını və bölgədə hərbi əməliyyatların sona çatdığını elan edib.
AzerVoice xəbər verir ki, forumdakı çıxışı zamanı Tramp HƏMAS-ın üzərinə götürdüyü öhdəlikləri yerinə yetirəcəyinə inandığını vurğulayıb. ABŞ lideri Qəzzada sülhün qısa müddət ərzində tam bərpa olunacağını və bölgənin yenidən qurulması prosesinə başlayacaqlarını diqqətə çatdırıb. Sülh Şurasının yaradılması ilə müharibədən sonrakı bərpa işlərinin beynəlxalq koordinasiya daxilində idarə olunması nəzərdə tutulur.
Prezident Tramp çıxışında Suriyadakı mövcud vəziyyətə də toxunaraq strateji qərarlarını açıqlayıb. O, Suriya liderinə güvəndiyini və bu səbəbdən Suriyaya tətbiq edilən bütün sanksiyaları ləğv etdiyini bildirib. ABŞ-ın Suriyada İŞİD-ə qarşı uğurlu əməliyyatlar keçirdiyini xatırladan Tramp terror təşkilatının tamamilə ortadan qaldırıldığını qeyd edib. Bu açıqlamalar ABŞ-ın Yaxın Şərq siyasətində yeni bir dönəmin başladığının göstəricisi kimi qiymətləndirilir.
