BAKI,AzerVoice, Nailə Babazadə
ABŞ və İran rəsmiləri arasında cümə günü keçirilməsi planlaşdırılan görüşün yeri və formatı ilə bağlı mühüm iddialar ortaya atılıb.
AzerVoice xəbər verir ki, "Axios" xəbər platformasının adını açıqlamayan rəsmi mənbələrə istinadən verdiyi məlumata görə, İran tərəfi müzakirələrin keçiriləcəyi məkanın və formatın dəyişdirilməsini tələb edib.
Əvvəlcə 6 fevral tarixində İstanbulda keçiriləcəyi iddia edilən görüşlərin İranın tələbi ilə Omana köçürüldüyü və ABŞ-ın bu təklifi qəbul etdiyi bildirilir. Məlumata görə, İstanbulda planlaşdırılan görüşəbir çox ərəb və müsəlman ölkəsinin müşahidəçi qismində qatılması nəzərdə tutulsa da, Tehran rəhbərliyi müzakirələrin yalnız ABŞ ilə ikitərəfli formatda aparılmasında israr edib.
Tehranın bu tələbinin arxasında danışıqları yalnız nüvə məsələləri ilə məhdudlaşdırmaq istəyi dayanır. İddia olunur ki, İran tərəfi bölgədəki digər ölkələr üçün prioritet təşkil edən raket proqramı və proksi qruplar kimi mövzuların gündəmə gəlməsindən yayınmağa çalışır.
Bu görüş 2025-ci ilin iyun ayında İran və İsrail arasında baş verən 12 günlük hərbi qarşıdurmadan sonra ABŞ və İran rəsmiləri arasındakı ilk birbaşa təmas olacaq. Görüşdə ABŞ Prezidenti Donald Trampın xüsusi nümayəndəsi Stiv Vitkoff və İranın xarici işlər naziri Abbas Əraqçinin mümkün nüvə sazişini müzakirə edəcəkləri gözlənilir.
İranın xarici işlər naziri Abbas Əraqçi Tehranın hər zaman diplomatiyaya hazır olduğunu bir daha bəyan edib. Bununla belə, o vurğulayıb ki, diplomatiya təzyiq, qorxu və güc tətbiqi ilə bir araya sığmır. Nazir aparılan bu diplomatik addımların müsbət nəticələrinin tezliklə ortaya çıxacağına ümid etdiyini bildirib.şşş
