BAKI,VOA, Nailə Babazadə
Çin hakimiyyəti beynəlxalq münasibətlərdə heç bir ölkənin təkbaşına hakimlik etmək və dünyaya öz istəklərini qəbul etdirmək hüququnun olmadığı barədə kəskin mesaj verib.
VOA xəbər verir ki, bu bəyanat ABŞ-ın İsrail ilə birlikdə İrana hücumları, Venesuelaya hərbi müdaxiləsi və Qrenlandiyanı ilhaq etmə tələbi kimi addımlarla qlobal siyasəti yenidən formalaşdırmağa çalışdığı bir dövrdə səslənib.
Çin Milli Xalq Kongresinin (ÇUHK) sözçüsü Lou Çincien illik ümumi yığıncaqdan əvvəl keçirdiyi mətbuat konfransında bildirib ki, dövlətlərin böyüklüyündən asılı olmayaraq qarşılıqlı hörmət və bərabərlik prinsipi BMT nizamnaməsinin əsasını təşkil edir. "Heç bir ölkənin digər xalqların taleyini diktə etməyə, inkişaf üstünlüklərini inhisara almağa və dünyaya yalnız öz istədiyini dayatmağa haqqı yoxdur" – deyə sözçü vurğulayıb.
Pekin rəsmi Vaşinqton və Təl-Əvivin hücumlarından sonra İrandakı vəziyyəti yaxından izlədiyini bəyan edib. Lou Çincien İranın suverenliyinə, təhlükəsizliyinə və ərazi bütövlüyünə hörmət edilməsinin vacibliyini qeyd edərək, hərbi əməliyyatların dərhal dayandırılmasını və Yaxın Şərqdə barış üçün dialoqun bərpa olunmasını tələb edib.
Sözçü qeyd edib ki, 80 ildən artıq təcrübə BMT-nin rolunun zəiflədilməsi deyil, əksinə gücləndirilməsinin vacib olduğunu göstərir. Çin, BMT Təhlükəsizlik Şurasının daimi üzvü kimi, təşkilatın nüfuzunun qorunması və qlobal idarəetmə sisteminin daha ədalətli olması üçün "Qlobal İdarəetmə Təşəbbüsü" çərçivəsində öz həll yollarını təklif etməyə davam edəcəyini bildirib.
